Երևան քաղաքի ընդհանուր իրավասության դատարանի Արաբկիրի նստավայրում մարտի 6-ին տեղի ունեցավ LIVEnews.am կայքի լրագրող Թագուհի Ասլանյանն ընդդեմ Հանրային խորհրդի նախագահ Ստյոպա Սաֆարյանի գործով դատական նիստը:
Լրագրողի պահանջն է վիրավորանք հասցնելու համար հրապարակային ներողություն խնդրել և փոխհատուցում տրամադրել:
Հիշեցնենք, որ հոկտեմբերի 29-ին, Միջազգային և անվտանգության հարցերի հայկական ինստիտուտն արգելել էր մի շարք լրատվամիջոցների մասնակցությունն իր կազմակերպած միջոցառմանը՝ «Հոկտեմբերի 27-ից 20 տարի անց. հայացք անցյալին, դասեր և մտորումներ» թեմայով։ Նախօրեին ՄԱՀՀԻ ղեկավար Ստյոպա Սաֆարյանն իր ֆեյսբուքյան էջում ազդագիր էր տեղադրել լրատվամիջոցների համար, որում մասնավորապես նշել էր, որ «News.am», «Hayeli.am», «168.am», «Yerevan Today», «7or.am», «Livenews.am» կայքերի, «5-րդ ալիք» ու «Երկիր մեդիա» հեռուստաընկերությունների համար մուտքը փակ է լինելու:
Ստեփան Սաֆարյանը դատարանի դահլիճում հարցրեց՝ արդյոք Թագուհի Ասլանյանի պաշտպանը տեղյա՞կ է, որ իր վստահորդին զգուշացվել է լքել մասնավոր տարածքը:
Կարդացեք նաև
Ի պատասխան լրագրողի պաշտպանն ասաց, որ տեղյակ է եղել: Հաջորդ հարցն էր՝ ինչո՞ւ է թաքցվել այդ փաստը հայցադիմումում: Պաշտպանը պատասխանեց, որ չի թաքցվել:
Ստեփան Սաֆարյանի ներկայացուցիչը դատարանի դահլիճում հայտարարեց, որ լրագրողը ներխուժել է Ստեփան Սաֆարյանին պատկանող մասնավոր տարածք, ուստի ինքն իրավունք ունեցել է պահանջել նրան լքել տարածքը:
Ստեփան Սաֆարյանի պաշտպանը նաև ուշադրություն հրավիրեց այն հանգամանքին, որ քննարկումն ավարտված է եղել, ինչը վկայում է, որ լրագրողը լուսաբանելու նպատակով չի եկել գրասենյակ: Նա ասաց, որ Ստեփան Սաֆարյանը պահանջել է, որ նա դուրս գա գրասենյակից, սակայն Թագուհի Ասլանյանը դուրս չի եկել: Այնուհետև պաշտպանը բառացի ներկայացրեց նրանց խոսակցությունը.
-Ստեփան Սաֆարյան-Ես կարո՞ղ եմ գալ նույնքան լկտի, ինչպես Դուք և ներխուժել Ձեր բնակարան:
Լրագրող-Պարոն Սաֆարյան, Դուք չե՞ք վիրավորում այս պահին լրագրողին:
Ստեփան Սաֆարյան- Ոչ, ես որակում եմ տալիս գործողությանը: Ես ասում եմ՝ լքեք տարածքը:
Լրագրող-Կներեք, լկտի ասելով՝ ի՞նչ նկատի ունեք:
Ստյոպա Սաֆարյան- Մուտք գործելը:
Լրագրող- Համեցեք մեզ մոտ մեր մասնավոր տարածք:
Ստեփան Սաֆարյան- Ես չեմ կամենում, ինձ հրավերներ մի ուղարկեք ոչ սաունաների, ոչ ձեր տարածքների, տների: Դուք իմ կինը չեք, որ ինձ որևէ տեղ հրավիրեք: Իմ կինը կարող է ինձ որևէ տեղ հրավիրել:
Թագուհի Ասլանյանի ներկայացուցիչը հարցրեց՝ ի՞նչն է դրդել Ստեփան Սաֆարյանին այն գնահատողական դատողությանը, որ Թագուհի Ասլանյանը ունեցել է սադրողական մոտեցում: Ստեփան Սաֆարյանը պատասխանեց, թե լրագրողը ներխուժել է իր տարածք, որտեղ իր հրավիրած փորձագետների հետ վարել է միջոցառում և հայտարարեց. «Երբ ես ինքս ես ընտրում մասնակիցներին, երբ լրագրողը չի ենթարկվում բոլոր տեսակի զգուշացումներին, այո, ինձ իրավունք եմ վերապահում դա որակել սադրանք»:
Նրա ներկայացուցիչն էլ հավելեց. «Մինչ այդ արտահայտությունն անելը Ստյոպա Սաֆարյանը հորդորել է, որ լրագրողները լքեն տարածքը: Այնպես չէ, որ նրանք միանգամից մուտքի մոտից առաջացան, և Ստյոպա Սաֆարյանն արեց այդ արտահայտությունը»: Ստեփան Սաֆարյանն էլ իր հերթին ասաց. «Իմ պատասխանը բխել է այդ պահին անձի չիմացությունից, այն փաստերից, որ ես հանձնարարել եմ երկու աշխատակիցներիս, որ օտար անձինք ներս չմտնեն, բայց ինչ-որ մեկը շրջանցել և ներս է մտել: Հետևաբար` այդ պահվածքից է բխել իմ արտահայտությունը: Դա բացարձակ չի ունեցել դիտավորություն: Ես հիմա էլ չեմ գտնում, որ ես իրեն վիրավորել եմ: Եթե դուք օգտագործեք իմ նկատմամբ այդ արտահայտությունը, ես չեմ վիրավորվի»:
Դատավորը գտավ, որ գործի քննության արդյունավետությունից է բխում, որ միասին դիտեն հայցվորի կողմից ներկայացված տեսաերիզը, որտեղ կադրեր են ներկայացված այդ միջադեպից: Երկու կողմերը համաձայնություն տվեցին:
Դատական նիստը հետաձգվեց: Հաջորդ դատական նիստը տեղի կունենա մարտի 31-ին՝ ժամը 14.00-ին:
Տաթև ՀԱՐՈՒԹՅՈՒՆՅԱՆ
