«Երեկ ՀՀ-ում գրանցվել է հերթական զոհն ընտանեկան բռնության: Գյումրիում, ըստ դատախազության տվյալների, ծեծի ենթարկվելուց եւ ութ ժամ այդ վիճակում մնալուց հետո հայտնաբերվել է կնոջ դին, իսկ նրա 13-ամյա աղջիկը՝ ծանր մարմնական վնասվածքներով տեղափոխվել է հիվանդանոց»,-ԱԺ այսօրվա նիստում անդրադառնալով Գյումրիում գրանցված միջադեպին՝ ասաց «Իմ քայլի« պատգամավոր Համազասպ Դանիելյանը:
«Սա 2020թ.-ի արդեն 3-րդ զոհն է: Ճիշտ այնպես, ինչպես ունենում ենք թույլատրելի մեծ թվով միջադեպեր բանակում, նույն տրամաբանությամբ բռնությունն ընտանիքում անթույլատրելի է եւ խարխլում է այդ կարեւոր ինստիտուտի հանդեպ վստահությունը: Երկու օր անց մեզանից շատերը Մարտի 8 կնշեն, փուչիկներ ու ծաղիկներ կառնեն կանանց, կենացներ կասեն, մինչդեռ ավելի կարեւոր է, որ հասկանանք՝ քաղաքացիների, ոստիկանության, դատախազության դերը պետք է վերաիմաստավորվի, որպեսզի նման դեպքեր այլեւս տեղի չունենան, եւ բռնությունն իրապես արմատախիլ արվի մեր հասարակությունից»,-նշեց Դանիելյանը:
Դեպքին անդրադարձավ նաեւ «Իմ քայլի» պատգամավոր Նազելի Բաղդասարյանը՝ շեշտելով, որ Գյումրիում գրեթե բոլորն իրար ճանաչում են, իսկ դեպքը տեղի է ունեցել ցերեկը՝ խիտ բնակեցված թաղամասում. «Սա շեշտում եմ, որովհետեւ լրատվամիջոցներին տված հարցազրույցներում հարեւանները փաստել են, որ այդ ընտանիքի անդամները պարբերաբար կապտուկներ են ունեցել: Սա հանրության անտարբերության մասին է խոսում: Երբ ասում ենք, որ մեր հանրությունում բռնություն կա, ոմանք ասում են՝ ոչ, դա հարիր չէ մեր արժեքներին…բռնություն, ցավոք, կա եւ այնքան է սերտաճել, որ շատերը դեպքին սառնասրտությամբ էին վերաբերվում, իսկ մահացած կնոջ հասցեին սոցցանցում վիրավորանքների տեղատարափն ուղղակի զարհուրելի էր: Եթե շարունակենք անտարբեր ձեւանալ, նման դեպքեր էլի կլինեն»:
Կարդացեք նաև
Լուիզա ՍՈՒՔԻԱՍՅԱՆ
