Երևան քաղաքի Կենտրոն վարչական շրջանի ընդհանուր իրավասության դատարանում մարտի 4-ին (նախագահող դատավոր Կարեն Ֆարխոյան) տեղի ունեցավ «Վարդգես Գասպարին ընդդեմ Արմեն Թավադյանի» գործով 5-րդ դատական նիստը:
Դատական նիստին ներկա չէր Արմեն Թավադյանը: Նրա պաշտպան Հովհաննես Խուդոյանը գրավոր դիմում էր ներկայացրել դատարանին Արմեն Թավադյանի բացակայության պատճառի մասին: Նախագահող դատավորն ընթերցեց դիմումը. «Տեղեկացնում ենք, որ Արմեն Թավադյանն այսօր տեղափոխվել է բուժզննության, ինչի պատճառով չի կարող ներկա գտնվել նիստին: Ուստի խնդրում ենք հետաձգել նիստը»:
Դատական նիստին ներկա չէր նաև տուժող Վարդգես Գասպարին, նրա ներկայացուցիչ Տիգրան Եգորյանը: Նա ևս դիմում էր ներկայացրել նիստը հետաձգելու խնդրանքով:
Նախագահող դատավորը որոշում կայացրեց գրություն ուղարկել քրեակատարողական հիմնարկ` պարզելու Արմեն Թավադյանի չներկայանալու պատճառները:
Կարդացեք նաև
Դատական նիստը հետաձգվեց: Հաջորդ դատական նիստը տեղի կունենա ապրիլի 2-ին:
Հիշեցնենք՝ Արմեն Թավադյանը մեղադրվում է մարտի 1-ի դեպքերից տուժած անձանց կաշառելու փորձի համար: Ըստ ՀՔԾ-ի, Թավադյանը ձերբակալվել էր Ռոբերտ Քոչարյանի ենթադրյալ աջակից Վարուժան Մկրտչյանին առնչվող քրեական գործի շրջանակներում, ՀՀ քրեական օրենսգրքի 340-րդ հոդվածի 4-րդ մասի 1-ին կետով նախատեսված հանցավոր արարք կատարելու կասկածանքով: Նա կալանավորված է:
Տաթև ՀԱՐՈՒԹՅՈՒՆՅԱՆ
