Շիրակի մարզպետ Տիգրան Պետրոսյանը, որը գլխավորում է Գյումրին ընդգրկող թիվ 31 ընտրատարածքի «Այո» նախընտրական շտաբը, պատասխանելով Aravot.am-ի հարցին, թե քարոզարշավ իրականացնելիս՝ ինչպե՞ս է համատեղելու մարզպետի պաշտոնը, արդյոք արձակուրդ է վերցնելո՞ւ, թե ՞ քարոզի է դուրս գալու աշխատանքից հետո, ասաց․ «Արձակուրդ, իհարկե, կվերցնեմ ամենաթեժ շրջանում, իսկ այս փուլում քարոզչական աշխատանքները կկատարեմ աշխատանքային ժամերի ավարտից հետո և շաբաթ-կիրակի օրերին։
Այս ընթացքում հանդիպելու ենք տարբեր ձևաչափով՝ երեկոները, իսկ շաբաթ-կիրակի օրերը ավելի հնարավոր է աշխատանքային բաց գրաֆիկով աշխատել, մարդկանց ներկայացնել մոտեցումները, հիմնական դրույթները, որոնք մենք ունենք առաջարկվող փոփոխության հետ կապված։ Գիտեք, որ վարչապետն այցելելու է մարզեր, այդ ընթացում փորձելու եմ արձակուրդ վերցնել»։
Ըստ մարզպետի, քարոզարշավն անցկացնելու են օրենքով ընդունված հնարավոր բոլոր բաց գործիքներն օգտագործելով՝ հանդիպումներ, իրազեկման գործողություններ։
Շիրակի մարզում կա՞ ձևավորված «Ոչ»-ի շտաբ, թե՞ ոչ, Շիրակի մարզպետն ասաց, որ տեղեկություն չունի։
Կարդացեք նաև
Հարցին՝ կա՞ն մարդիկ, որոնք «Ոչ»-ի ուղղությամբ են աշխատում, մարզպետն ասաց․ «Իսկ ինչո՞ւ չպիտի լինեն։ Մենք ուրախ կլինենք մարդկանց հետ համակարգված աշխատել՝ ինչո՞ւ այո, ինչո՞ւ ոչ»։
Մարզը կունենա «Այո»-ի 8-9 աշխատանքային գրասենյակներ, իսկ Գյումրին ընդգրկող թիվ 31 ընտրատարածքում կլինեն երկու գրասենյակներ։
Նունե ԱՐԵՎՇԱՏՅԱՆ
