«Հայաստանի դեպքում Մարդու իրավունքների եվրոպական դատարանում (ՄԻԵԴ) ունենք քսան առաջատար, առաջնային գործ, որոնք դեռ փակված չեն: ՀՀ առնչությամբ առաջնային գործերի վճիռների 55 տոկոսը մնում են չկատարված»,- Երևանում կազմակերպված Մարդու իրավունքների եվրոպական դատարանի վճիռների կատարման բարելավման վերաբերյալ քննարկմանը հայտարարեց European Implementation Network –ի փոխնախագահ Ֆիլիպ Լիչը:
Նշենք, որ քննարկումն անցկացնում է European Implementation Network-ը Հելսինկյան քաղաքացիական ասամբլեայի Վանաձորի գրասենյակի հետ համատեղ: Քննարկման նպատակն է ստեղծել հարթակ ազգային և միջազգային փորձագետների համար՝ քննարկելու Հայաստանում մարդու իրավունքների և իրավունքի գերակայության արդի խնդիրները։
Ֆիլիպ Լիչը նշեց, թե իրենց նպատակն է վերահսկել, որ ՄԻԵԴ-ի վճիռների կատարումն իրականացվի: Նա հայտարարեց. «Եվրոպական դատարանը դարձել է արդարադատության գլոբալ փարոս՝ պաշտպանելով Եվրոպայի տարածքում ազգային փոքրամասնությունների, ԼԳԲՏ համայնքի ներկայացուցիչների, մարդու իրավունքների պաշտպանների իրավունքները: Մենք շատ ուժեղ միջազգային դատարան ունենք, որն ապահովում է անվտանգության ցանց, հատկապես այն դեպքում, երբ ներպետական դատարանները չեն կարողանում կատարել իրենց դերը: Խնդիր կա վճիռների կատարման հետ: Հաճախ հարց է բարձրացվում՝ ինչի՞ կարող են և պետք է հանգեցնեն այդ վճիռները»:
Ֆիլիպ Լիչի կարծիքով՝ պետք է փոխել պետական մարմինների գործելաոճը, պաշտոնական անձանց աշխատաոճը, բայց երբեմն դատավճիռները նաև նպաստում են այդ փոփոխությանը:
Կարդացեք նաև
Խոսելով ՀՀ կառավարության գործունեության մասին՝ European Implementation Network -ի փոխնախագահը ցավով նշեց. «ՀՀ կառավարությունը չի ներկայացնում Եվրոպայի խորհրդի Նախարարների կոմիտե գործողությունների պլան և չի ներկայացնում առաջարկություններ ի պատասխան վճիռների: Կամ էլ դրանք ներկայացվում են ուշ»:
Տաթև ՀԱՐՈՒԹՅՈՒՆՅԱՆ
Լուսանկարը՝ Helsinki Citizens’ Assembly-Vanadzor-ի
