ԱԺ այսօրվա նիստում առաջին ընթերցմամբ քննարկում է Կառավարության հեղինակած՝ ապօրինի ծագման գույքի բռնագանձման մասին օրինագիծը, որի վերաբերյալ աշխատանքային քննարկումներ են տեղի ունեցել դեռեւս 2019թ.-ի փետրվարից:
Ինչպես հայտարարեց ՀՀ Արդարադատության նախարար Ռուստամ Բադասյանը, օրինագիծը կարգավորում է առանց մեղադրական դատավճռի գույքի բռնագանձման ինստիտուտի ներդրումը. «Քաղաքացիական, եւ ոչ քրեական գործերի մասին է: Ակնկալում ենք կատարելագործել ապօրինի ծագման գույքը տնտեսական շրջանառությունից հանելու օրենսդրական գործիքակազմը: Իրավամեխանիզմը թույլ կտա բռնագանձել այն գույքը, որը չի հիմնավորվում եկամտի օրինական աղբյուրներով: Գույքի՝ ապօրինի ծագման կանխավարկածը կարող է հերքվել պատասխանողի կողմից՝ գույքի ձեռքբերումը հիմնավորող ապացույցների ներկայացման դեպքում: Ապօրինի գույքը՝ չհիմնավորված հարստությունը, բռնագանձվելու է հօգուտ պետության»:
Նախարարը հավելեց, որ այս օրենքը կյանքի կոչող մարմինը գործելու է դատախազությունում: Ռուստամ Բադասյանը վստահեցրեց, որ այս օրենքն արտագնա աշխատանքով եկամուտ վաստակած անձանց չի վերաբերելու:
«Իմ քայլի» պատգամավոր Գեւորգ Պապոյանը հետաքրքրվեց՝ եթե անձը ոչ կոռուպցիոն ճանապարհով է գույք ձեռքբերել, որի համապատասխան պայմանագրերը կամ փաստաթղթերն ինչ-ինչ պատճառներով չեն պահպանվել, այս դեպքում օրենքը տարածվու՞մ է նրա վրա: Բադասյանը պատասխանեց, որ ոչ. «Բայց եթե նրա անունով այլ պաշտոնյա ունի գույք, ապացուցման բեռը կրում է պետությունը: Անձը, որը չի պահպանել պայմանագիր կամ արտագնա աշխատանք է կատարել ու եկամուտները չի կարող հիմնավորել, այս օրենքի հետ կապ չունի»:
Կարդացեք նաև
Ռուստամ Բադասյանը նաեւ շեշտեց, որ գործարարներն այս օրենքից մտահոգվելու առիթ չունեն. «Եթե գործարարը որեւէ փուլում ձեռք է բերում գույք, որի ծագումն ի սկզբանե ապօրինի է, գույքը նրանից չի բռնագանձվում: Գույքի արժեքը կբռնագանձվի նրանից, ով գույքը ձեռք է բերել սկզբնական փուլում»:
Լուիզա ՍՈՒՔԻԱՍՅԱՆ
