«Իշխանությունը խախտել է պայմանը եւ դատավորների «վեթինգ» չի իրականացնում: Սա քաղաքական պատասխանատվություն էր, որը դուք ստանձնել էիք: Սակայն ապավինել եք այն բանին, որ հանրությունը լիարժեք պահանջատեր չի լինի, որովհետեւ նրա համար «վեթինգի» երեւույթը խորթ է: Բայց համաձայնեք, որ դուք ՀՀ-ում սկիզբ եք դնում մի քաղաքական մշակույթի, երբ խոստում եք տալիս եւ այն չեք կատարում՝ միայն նրա համար, որ ժողովուրդը ձեզ կների, որովհետեւ դուք բարի թագավորներ եք»,-ԱԺ այսօրվա նիստում այսօր հայտարարեց «Լուսավոր Հայաստանի» պատգամավոր Անի Սամսոնյանը:
Հիշեցնենք, որ առաջին ընթերցմամբ քննարկվում է ՀՀ Արդարադատության նախարարության մշակած՝ ՀՀ Դատական օրենսգրքում փոփոխությունների օրենսդրական փաթեթը, որն այդ թվում սահմանում է՝ դատավորի նշանակման տարիքային շեմը 28-ից իջեցվում է 25-ի:
Անի Սամսոնյանի խոսքով՝ ակնկալվում էր, որ գոնե այս օրենսդրական փաթեթը կարտացոլի ժողովրդի եւ պատգամավորների կամքը՝ ունենալու արդար դատական համակարգ. «Նախարար Ռուստամ Բադասյան, զարմացած եմ, որ այսքան փոփոխություններ եք արել, բայց չեք փոխել այն հոդվածը, որով ԲԴԽ-ն դատավորների անկախության երաշխավորն է: Ձեր փոփոխություններով ստացվում է, որ ԲԴԽ-ն դատարանների եւ դատավորների կախյալ լինելու երաշխավորն է, որովհետեւ ԲԴԽ-ին տալիս եք վերահսկողության այնպիսի լծակներ, որոնք կարող են սահմանափակել դատավորների ազատությունը»:
Խոսքն, ըստ Անի Սամսոնյանի, այն մասին է, որ դատավորին պատասխանատվության ենթարկելու հարց քննարկելիս Բարձրագույն դատական խորհուրդն է որոշելու, թե արդյոք դատավորի արարքը նվազ կարեւո՞ր է եղել, թե ոչ. «Դուք ԲԴԽ-ին հնարավորություն եք տալիս մտնելու դատավորների որոշումների բովանդակության մեջ: Այս փոփոխությունները չեն արտացոլում անկախ դատական համակարգ ունենալու բոլորիս կամքը: Գուցե դատավորներն այլեւս չզանգեն իշխանությանը, բայց եթե այս փաթեթն այսպես ընդունվի, դրա անհրաժեշտությունը չի էլ լինի, որովհետեւ կլինի ԲԴԽ-ն, որն օրենսդրորեն ապահովելու է կախյալությունը»:
Կարդացեք նաև
Լուիզա ՍՈՒՔԻԱՍՅԱՆ
