Շիրակի մարզպետ Տիգրան Պետրոսյանն այսօր եղել է մարզի խոշոր առևտրային կենտրոններում, ուսումնասիրել, թե ինչ է կատարվում․ արդյոք իրականում ժողովրդի մոտ խուճապային տրամադրություն է՝ կապված կորոնավիրուսի մասին տեղեկատվության հետ։
Շիրակի մարզպետը մեզ հետ զրույցում ասաց, որ կորոնավիրուսի դեմ պայքարի շրջանակներում համապատասխան գերատեսչությունների հետ համատեղ աշխատանքներ են իրականացնում ՝սկսած բժշկական անձնակազմի վերապատրաստումից մինչև ռիսկային գոտիներից Շիրակի մարզ ժամանող մարդկանց վերահսկումը։
Իսկ երեկ առավոտյան, երբ հայտարարվել է Հայաստանի Հանրապետությունում կորոնավիրուսով վարակվելու առաջին դեպքի մասին, Շիրակի մարզպետարանում հրատապ խորհրդակցություն է հրավիրվել ու կրթության, գիտության, մշակույթի և սպորտի նախարար Արայիկ Հարությունյանին ներկայացվել է դպրոցներում բացակայությունների քանակը, որոնք միջինից բարձր է եղել ու առաջարկվել է դիտարկել արձակուրդներն այս շաբաթ տեղափոխելու հնարավորությունը։
Ըստ մարզպետի, երեկ քննարկում է տեղի ունեցել նաև մարզի առաջնային բուժօղակի ղեկավարների հետ։
Կարդացեք նաև
Իսկ այսօր առավոտյան Տիգրան Պետրոսյանը Գյումրու տպարաններից մեկում կորոնավիրուսի դեմ պայքարի մասին տեղեկատվական ցուցապաստառների մեծ խմբաքանակ է պատվիրել, դրանք ուղարկվել են բոլոր համայնքների ղեկավարներին՝ տեղում իրազեկում իրականացնելու։
«Իմ կողմից առավոտ այցելություն է եղել Շիրակի մարզի մեծ առևտրային ցանցեր, որպեսզի գնահատենք՝ արդյոք կա խուճապային տրամադրություն Շիրակի մարզում։ Պիտի նշեմ, որ Շիրակի մարզում մենք այս պահին որևէ առևտրային կետում որևէ պարենային մթերքի պակաս չունենք։ Փորձեցի ճշտել` երեկ ինչ ակտիվություն է եղել, ասացին, որ այդ ակտիվությունը շատ չի տարբերվել իրենց միջին կիրակնօրյա առևտրի ակտիվությունից։
Շատ ուշադիր հետևում ենք, բոլոր դերակատարները՝ հիվանդանոցներ, պոլիկլինիկաներ, ունեն հստակ ընթացակարգեր, աշխատանքի տեսչությունը, էպիդեմիոլոգիական ծառայությունները իրենց տեղերում աշխատում են։ Այն խնդիրները, որոնք կան, հենց երեկ հատկապես հիվանդանոցներին մեր կողմից հորդոր է եղել կտրուկ նվազեցնել հիվանդանոցային այցելությունների քանակը, որպեսի այս փուլում բոլոր հնարավոր ռիսկերը նվազեցնենք,որպեսզի համաճարակային վիճակը հիվանդանոցներում վերահսկելի լինի։
Գիտեք, պաշտպանության նախարարությունը զորամասերի հետ կապված առանձին մոտեցում ունի, կրթության գործընթացի այս փուլում մենք խորհուրդ ենք տվել մարզի տարբեր մարդաշատ միջոցառումները որոշակի ժամանակով տեղափոխել, որպեսզի առավելագույնս ավելի քիչ ռիսկերով փորձենք դիմակայել»,-ասաց մարզպետը։
Վերջինս վստահեցնում է, որ Գյումրու օդային սահմանը ևս վերահսկվում է։
«Տեսչության և նախարարության աշխատակիցները դիտարկում են այն մարդկանց, որոնք ռիսկային գոտում են, թեև պիտի նշեմ, որ այսօրվա փոքր աշխարհի կոնցեպտում, երբ որ կապերն շատ ակտիվ են, վերահսկելը տեխնիկապես երբեմն անհնար է, որովհետև մենք որպես ազգ, որն ունի ամենամեծ Սփյուռքերից մեկը, այսինքն` ավելի շատ հայ մարդ է ապրում Հայաստանից դուրս, հաղորդակցման առումով բավականին ակտիվ կոմունիկացիոն տիրույթում ենք։
Բացի դրանից, մեր ներքին միջանձնային հարաբերությունները շատ ավելի սերտ, շատ ավելի ջերմ են՝ գրկախառնություններ, բարևելուց համբուրվել, որը իր հետ որոշակի ռիսկեր է բերում, այսօր փորձում ենք տեղեկատվական աշխատանքի շնորհիվ մարդկանց որոշակի կանոններ ներկայացնել, որը վստահաբար իր ազդեցությունը կթողնի»։
Տիգրան Պետրոսյանն ասաց, որ իրենք պարբերաբար ստանում են տվյալներ արտերից Շիրակի մարզ վերադարձողների մասին։ Ըստ մարզպետի, Չինաստանը լավ աշխատաշուկա է օտար լեզու տիրապետող երիտասարդների համար, ու իրենք շաբաթական միջինը 5-7 վերադարձողի հետ կապված գործառույթ իրականացնում են։
Այս ընթացքում Չինաստանից վերադարձողների հետ կապված որևէ խնդիր չեն ունեցել։
Շիրակի մարզպետն ասաց, որ ամեն ինչ անում են, որպեսզի որևէ խուճապային տրամադրություն չլինի Շիրակի մարզում։
Նունե ԱՐԵՎՇԱՏՅԱՆ
Շեֆի նման պոպուլիստ է։սուտի հեղափոխական։