Այսօր ԱԺ պետաիրավական հարցերի հանձնաժողովի նիստում քննարկվեց «Իմ քայլը» խմբակցության պատգամավորներ Նիկոլայ Բաղդասարյանի եւ Արուսյակ Ջուլհակյանի նախագիծը, որով նախատեսվում է տեսակապի միջոցով հարցաքննելու հնարավորություն տալ տուժողին եւ վկային: Դեպքեր կան, որ վկան, ասենք, ավտովթար է տեսել, Գյումրիից պիտի գա հասնի Երեւան, որ վկայություն տա, անընդհատ ձգձգվում է, մինչեւ գա: Կամ դեպք է եղել, երբ վկան Մեղրիում է եղել, ճանապարհներն էլ փակ, դրա պատճառով գործը տեւական ժամանակ ձգձգվել է: Հիմա, եթե վկան կամ տուժողը, օրինակ, զառամյալ են, դժվարություն ունեն գալու, կարող են տեսակապի միջոցով քննչական գործողությունների մասնակցել:
Վարույթն իրականացնող մարմինը պետք է անպայման տեսնի հարցաքննվողին կամ վկային, ինքնությունը հաստատի: Վկայի տեսաձայնագրությունը սղագրվում է, բայց արձանագրությանը կցվում է նաեւ տեսաձայնագրությունը ու հիմք է համարվում հենց ձայնագրությունը:
Արուսյակ Ջուլհակյանն ասաց, որ այս նախագիծն ուղղված է տուժողների, վկաների շահերին, նրանց կյանքը հեշտացնելուն, նաեւ քննիչների կյանքը հեշտացնելուն. «Բյուրոկրատական քաշքշուկներից ու գործող ընթացակարգերով պայմանավորված՝ քննչական գործողությունները երբեմն բավականին երկար են տեւում, ինչը չի բխում գործերի քննության արդյունավետությունից»:
Որպես նախկին քննիչ, Սերգեյ Ատոմյանը շատ գոհ էր այս նախագծից, իսկ հանձնաժողովի նախագահ Վլադիմիր Վարդանյանը հիշեց «Մենք ենք, մեր սարերը» ֆիլմը, երբ ամբողջ գյուղով գնում էին քաղաք՝ հարցաքննվելու:
Կարդացեք նաև
Ուշագրավ է, որ առաջինից երկրորդ ընթերցման ժամանակ հեղինակները մտադիր են նաեւ տեսակապով հարցաքննվելու հնարավորություն տալ արտերկրում բնակվողներին, նրանք կարող են գալ հյուպատոսարան, որը համարվում է ՀՀ տարածք ու հարցաքննվել, արտգործնախարարությունը ճշտել է, տեխնիկական միջոցներ բոլոր հյուպատոսարաններն ունեն:
Նախագիծը դրական եզրակացություն ստացավ:
Հռիփսիմե ՋԵԲԵՋՅԱՆ
