«Պարիս Հերունին հիմա չկա, բայց ես իր տղայի հետ եմ շարունակում մեր աշխատանքները, ծրագրերը: Նախկինում մեր ծրագրերը կիսատ էին մնում, որովհետեւ գումար չկար, իսկ հիմա կարծես թե կա: «Հայաստան» համահայկական հիմնադրամը հավաքել է մոտ 10 մլն դոլար, որից կեսը ծախսվել է Արցախում, Լոռիում, Տավուշում եւ Շիրակի մարզում` արեւային տեխնիկայի տարածման վրա»,- «Տեսակետ» մամուլի ակումբում նշեց Երկրների հելիոֆիկացիայի ծրագրի հեղինակ, տեխնիկական գիտությունների դոկտոր Վահան Համազասպյանը, որը խոսեց Շիրակում և Արցախում առաջին հելիոֆիկացված գյուղերի ստեղծման ծրագրի մասին:
«Այսօր մամուլում քարոզվում է արեւային տեխնիկայի զարգացումը դիտարկել որպես չինական արտադրության արեւային սարքերի բիզնեսի կազմակերպում: Հիմա Փաշինյանը պետք է ընտրություն կատարի` հիմնադրամի հոգաբարձուների խորհրդի նախագահ լինելով, թե որ ուղղությամբ ենք գնում. կազմակերպել չինական արեւային տեխնիկայի ներկրումը Հայաստա՞ն, թե՞ Հայաստանում ստեղծել գործարաններ: Օրինակ, Շիրակի մարզի Սառնաղբյուր գյուղում, որտեղի ավագանու որոշումը ունեմ եւ Արցախում կարելի է իրականացնել մեր ծրագիրը: Պետք է փորձել հասկանալ, թե որն է նպատակահարմար Հայաստանի համար` «Հայաստան» հիմնադրամի գումարների մի մասը տրամադրել արեւային տեխնիկայի հայկական տարբերակին, թե չինական արեւային տեխնիկա բերելուն, որը զուտ կոմերցիա է»,-ասաց նա:
Վահան Համազասպյանի ձեւակերպմամբ, այսպես կոչված` «ատկատային» տնտեսությունից խուսափելու համար պետք է գումարները ճիշտ ծախսել. «Եթե աշխարհին ցույց տանք հետաքրքիր առաջարկություններ, մեր հայրենակիցները տեսնելով, որ իրենց հավաքած 10 մլն գումարը ճիշտ է ծախսվել, հաջորդ տարի 10 եւ 100-ապատիկ ավելի գումարներ կհանգանակեն»: Գիտնականը կարծում է, որ նման նախագծերում պետք է բաժնետեր դարձնել մեծ գումարներ հանգանակած ներդրողներին, հայկական գործարաններ ստեղծել:
«Մարդիկ կհասկանան, որ իրենց տված գումարները ծառայում են նպատակին, հայրենիքին էլ բերում են ճանաչում…Փաշինյանն էլ հիմք կունենա Մյունխենյան հանդիպումներին չկմկմալու ու աշխարհին ներկայացնելու, որ Հայաստանն աշխարհին տվել է բնապահպանական աղետից փրկվելու լուծում»,-հավելեց նա:
Կարդացեք նաև
Համազասպյանը հայտարարեց, որ իր տեղեկություններով մոտ 20 ընկերությունների գումար է տրամադրվել չինական արեւային տեխնիկա բերելու համար` առանց տենդեր հայտարարելու, մինչդեռ հնարավոր էր այդ փողերով տնտեսության թռիչքաձեւ զարգացում ապահովել հելիոֆիկացիայի ծրագրի միջոցով: «Մենք աշխարհում հայտնի կդառնանք որպես երկիր, որը աշխարհին բնապահպանական աղետից ազատվելու ճիշտ ճանապարհ է ցույց տալիս: Բնապահպանական աղետ ասելով պատկերացնում ենք կլիմայի փոփոխությունը, ջերմաստիճանի բարձրացումը, սառույցների հալվելը… Բայց ավելի վտանգավոր երեւույթ էլ կա, երբ օվկիանոսի ջուրը տաքանում է, այնտեղից սկսվում է մեթան գազ բարձրանալ, որը 14 անգամ ավելի վտանգավոր էֆեկտ է տալիս, քան ածխաթթու գազը: Այս վտանգը սպառնում է մարդկության գոյությանը: Մեր ծրագրով Հայաստանը կարող է դառնալ պիոներ աշխարհը բնապահպանական աղետից փրկելու առումով: Ես ցանկացած լսարանի առաջ կարող եմ ապացուցել, որ մեծ ծրագիրն աշխատող է եւ ռեալ օգուտ կարող է բերել»,-համոզված է նա:
Գոհար ՀԱԿՈԲՅԱՆ
