Իշխող «Իմ քայլը» խմբակցության պատգամավոր, ադրբեջանագետ Տաթեւիկ Հայրապետյանը պատահականություն կամ նորություն չի համարում Թուրքիայի նախագահի` վերջերս Բաքվում արած այն հայտարարությունները, որ Թուրքիան Արցախի հարցը ընդունում է ոչ թե իբրեւ Ադրբեջանի հարց, այլ նաեւ Թուրքիայի:
Հիշեցնենք, վերջերս Բաքվում կայացավ Թուրքիայի նախագահ Ռեջեփ Թայիբ Էրդողանի եւ Ադրբեջանի նախագահ Իլհամ Ալիեւի հանդիպումը, որի ժամանակ քննարկվել են երկկողմ համագործակցության հարցեր, ինչպես նաեւ անդրադարձ է եղել Արցախի հարցի կարգավորման ներկայիս փուլին:
Այսօր «Բլից ինֆո» մամուլի ակումբում Թուրքիայի նախագահի Ադրբեջան կատարած այցի եւ Բաքվում արած հայտարարությունների մասին իշխող խմբակցության պատգամավորն ասաց, որ նման քաղաքականություն Թուրքիան որդեգրել է դեռ 1990-ականներից: Այս պահվածքն, ըստ բանախոսի բխում է`իրենց «մեկ ազգ, երկու պետություն» կարգախոսից, նաեւ ասում է՝ Թուրքիայում կա ընկալում, որ Արցախի հարցը հօգուտ իրեն լուծելուց հետո Հայաստանը նաեւ Նախիջեւանի նկատմամբ է հավակնություններ ցուցաբերելու, ապա` Կարսի, Արդահանի: Այս համատեքստում խոսելով Հայաստանի դիրքորոշման մասին, նա հիշեցնում է` մենք հայտարարել ենք, որ տարածաշրջանում ոչ միայն Ադրբեջանին ենք համարում Հայաստանի համար սպառնալիք`անվտանգության առումով, այլ նաեւ Թուրքիային. «Մեր անվտանգային գործողությունները բխում են նաեւ այս հանգամանքից»:
Այսօր լրանում է Սումգայիթում հայերի կոտորածի 32-րդ տարելիցը: Սումգայիթը Բաքվից 26 կիլոմետր հեռավորության վրա է գտնվում: 32 տարի առաջ`ի պատասխան ԼՂՀ-ում բնակվող մեր հայրենակիցների խաղաղ ցույցերի, Սումգայիթի հայ բնակչությունը զանգվածային ջարդերի եւ հալածանքների ենթարկվեց Ադրբեջանի խորհրդային իշխանության լուռ համաձայնությամբ: «Այս գործելաոճով Ադրբեջանը հերթական անգամ ապացուցեց, որ հայն իր համար թշնամի է եւ չկա որեւէ ձեւ, անգամ խորհրդային 70-ամյա համատեղ կյանքը, որ ատելությունը մեղմվի»,- ասաց Տաթեւիկ Հայրապետյանը: Սումգայիթի ջարդերին հետեւեցին Գանձակի, ապա Բաքվի ջարդերը: Այս ամբողջը, եւ առհասարակ, վերջին մեկ դարի ընթացքում կովկասյան թաթարների կողմից պարբերաբար հայ ազգաբնակչության նկատմամբ կազմակերպվող բռնությունները, ըստ ադրբեջանագետի, հստակ ցույց են տալիս, որ դրանք մեր ազգային ինքնության դեմ են ուղղված:
Կարդացեք նաև
Խոսելով Խոջալուի դեպքերի մասին, ինչը ադրբեջանական կողմը այս տարիների ընթացքում, նաեւ վերջին օրերին, շատ ինտենսիվ կերպով փորձում էր ներկայացնել իբրեւ հայերի կողմից իրականացված ջարդեր, Տաթեւիկ Հայրապետյանն ասաց, որ այս տարիների ընթացքում բազմիցս են հրապարակվել փաստեր, այդ թվում նաեւ ադրբեջանական կողմից վկայություններ, որ այդ ամենն արդյունք էր Ադրբեջանում ներքաղաքական գործընթացների. «Խոջալուի օպերացիան նախ պայմանավորված էր Ստեփանակերտը հումանիտար ճգնաժամից փրկելու անհրաժեշտությամբ: Ստեփանակերտը ռմբակոծվում էր բոլոր կողմերից եւ այդ գործողությունն անհրաժեշտ էր Ստեփանակերտի խաղաղ բնակչությանը փրկելու տեսանկյունից»:
Բանախոսը հիշեցնում է ժամանակին նաեւ ռուսական մամուլի հրապարակումները, որ հայերը պատրաստակամություն են հայտնել հումանիտար միջանցք տրամադրել` հավելելով, որ Ադրբեջանի այն ժամանակվա նախագահի` Մութալիբովի դեմ պայքարող «Ժողովրդական ճակատի» ներկայացուցիչները, տեղի բնակչությանը այլ ուղղությամբ են տարել`շրջանցելով մարդասիրական միջանցքը, ինչի արդյունքում էլ տեղի է ունեցել ողբերգությունը: Սակայն բոլոր աղբուրները, այդ թվում նաեւ Մութալիբովի հայտարարությունները, վկայում են, որ այդ ամենը ներքաղաքական պայքարի արդյունք էր, ինչը փորձ էր արվում «կոտրել» հայերի գլխին: Ինչեւէ, այդ ամենի արդյունքում, «Ժողովրդական ճակատին» այդ ժամանակ հաջողվեց տապալել Մութալիբովի իշխանությունը:
Տաթեւիկ Հայրապետյանը վստահեցնում է, որ հայկական կողմը միջազգային հարթակներում լավագույնս աշխատում է`իրականությունը ներկայացնելու եւ թուրք-ադրբեջանական ագրեսիվ քարոզչությունն ի չիք դարձնելու համար: Ասում է`դա մեզ հաջողվում է: Նա կարծում է, որ անգամ մյունխենյան հարթակում Ալիեւը փորձեց զոհի կերպարով հանդես գալ` հիշատակելով այդ դեպքերը, սակայն, ակնհայտ է, որ այդ ամենն իրենց հայատյաց քաղաքականության մեջ է տեղավորվում: Նաեւ ասում է, որ միջազգային հարթակներում Ադրբեջանն ու Թուրքիան ագրեսիվ են հանդես գալիս ու խնդիրներ են հարուցում բոլորի համար:
Պատասխանելով տարածքների ազատագրված վերադարձի մասին հարցին, Տաթեւիկ Հայրապետյանն ասաց, որ Հայաստանը մեկ անգամ չէ, որ հայտարարել է` անվտանգության առնչությամբ զիջելու կամ մեկ քայլ անգամ ետ գնալու մենք չենք դրել: Ինչ վերաբերվում է փախստականների հարցին, ինչին ադրբեջանական կողմն անընդհատ անդրադառնում է, բանախոսը նշում է, որ նախորդիվ` հայկական կողմն այդ հարցում թերացել է, նույնիսկ ճշգրիտ բազայի խնդիր ունենք. «Ես կարծում եմ, դա մեզ համար եւ քաղաքական, եւ իրավական առումով կարեւոր է: Հունվար ամսին համատեղ լսումներ եւ նիստ կազմակերպվեցին Արցախի խորհրդարանի հետ այդ հարցով: Դա իսկապես կարեւոր հարց է, ինչի մասին պետք է խոսել եւ ցույց տալ Ադրբեջանի վարած քաղաքականությունը`շարունակաբար իրականացնել զտումներ, դիսկրիմինացիա տեղի հայկական բնակչության նկատմամբ»:
Նելլի ԳՐԻԳՈՐՅԱՆ
