Ռուս հայտնի բլոգեր Իլյա Վարլամովը այցելել է Երևան և իր բլոգում պատմել Հայաստանի մայրաքաղաքի մասին՝ «Երևան, որին ոչ մեկ չի սիրում» խորագրով հոդվածում: Վարլամովը մի շարք լուսանկարներ է հրապարակել Երևանից և մանրամասն պատմել քաղաքի մասին:
Բլոգերը Հայաստանում գնահատել է այն փաստը, որ ամեն ինչ մատչելի է, ինչի շնորհիվ ամբողջությամբ չի ծախսել բանկոմատից հանված 100 ԱՄՆ դոլարը:
Անդրադառնալով Երևանի ճարտարապետությանը՝ բլոգերը նշում է, որ քաղաքում անփույթ վերաբերմունք են ցուցաբերել հին շենքերի, շինությունների հանդեպ, դրանց մեծ մասն ավիրված է կամ դարձել է ժամանակակից կառույցների ֆասադի մի մաս: «Ցավալի է, որ հայերը չեն գնահատել հին Երևանի գեղեցկությունը և որոշել են քանդել ամեն ինչ: Այո, կատակի է նման, բայց քաղաքում հին շինություններ գրեթե չկան»:
Միևնույն ժամանակ բլոգերին դուր է եկել քաղաքի նոր ճարտարապետությունը: «Պետք է փաստել, որ Երևանի նոր ճարտարապետությունն, ընդհանուր առմամբ վատը չէ: Ամեն ինչ շատ հանգիստ է շնորհիվ տուֆի: Բայց ամեն դեպքում այս փողոցում հարմարավետ չես զգում քեզ… Այստեղ բարձր ծառերի պակաս կա, ծառեր կարելի էր այստեղ տնկել, բայց հաղթեց ագահությունը. գետնի տակ առևտրի կենտրոն են կառուցել: Այս փողոցում շքեղ կնայվեր նաև տրամվայը»,-պատմում է Վարլամովը Հյուսիսային պողոտայի մասին:
Կարդացեք նաև
Ռուս բլոգերը կարծում է, որ Երևանի մայթերով գրեթե անհնարին է քայլել, քանի որ ամենուր մեքենաներ են կայանված: «Հնարավոր է՝ հայերը կարծում են, որ զբոսաշրջիկները իրենց մայրաքաղաք են գալիս, որպեսզի իրենց մեքենաները տեսնեն»:
Իլյա Վարլամովի խոսքով՝ Երևանի նման քաղաքներում «հաճելի չէ ապրել». նա Երևանի իշխանություններին խորհուրդ է տալիս առաջնահերթությունների փոփոխության բարեփոխումներ իրականացնել, իսկ երևանցիներին՝ սիրել իրենց մայրաքաղաքը:
Պատրաստեց՝ Վիկտորյա ԱՆԴՐԵԱՍՅԱՆԸ
Մունտառ Երեւան՝
https://haytougchamlian.blog/մունտառ-երեւան/