*** Իրանի Առողջապահության նախարարության խոսնակը հայտնել է, որ այսօր` հինգշաբթի օրվա դրությամբ մոտ մեկ շաբաթվա ընթացքում կորոնավիրուսից մահացել են 26 հոգի, հաստատվել է 245 վիրուսակիրի գոյություն, որոնք բժշկական խնամքի տակ են գտնվում: Վարակը նկատել են Իրանի 31 նահանգներից 23-ում: Վիրուսի տարածման կենտրոն Ղոմ քաղաքում երեկ մահացել են նաև Իրանի կանանց ֆութզալի ազգային հավաքականի անդամ Էլհամ Շեյխին և Վատիկանում Իրանի երբեմնի դեսպան Հադի Խոսրոշահին:
*** Վարակվել են նաև իսլամական խորհրդարանի երեք պատգամավոր` մեկը Ազգային անվտանգության մշտական հանձնաժողովի նախագահ, Առողջապահության նախարարության մեկ փոխնախարար, Ղոմ քաղաքի բժշկական համալասարանի ռեկտորը, Թեհրանի մեկ թաղապետ և հանրապետության նախագահի կանանց հարցերով խորհրդական տիկին Մասումե Էբթեքարը:
*** Կառավարության որոշումով ախտահանվում են հանրային և մարդաշատ վայրերը, փողոցները և հանրային ամեն տեսակի տրանսպորտային միջոցները: Որոշ սրբավայրերի կրոնապետերը դեռևս ընդդիմանում են ախտահանման կապակցությամբ կառավարության որոշումը գործադրելու: Շիաների յոթերորդ իմամի աղջիկ Ֆաթիմե Մասումեի Ղոմ քաղաքում գտնվող շիրիմ-սրբավայրի կրոնապետը հայտնել է, որ հնարավոր չէ հիվանդներին բուժող սրբավայրը հիվանդության տարածման օջախ լինի:
Կարդացեք նաև
*** Կորոնավիրուսի դեմ պայքարը համակարգող պետական շտաբի նախագահ Զալին Դատական Ուժին խնդրել է կալանավայրերում համաճարակի տարածման դեմն առնելու համար, կալանավորներին արձակուրդ տալ: Նախապես նման կոչով դիմել էին բանտարկյալների հարազատները, իսլամական խորհրդարանի պատգամավոր Մահմուդ Սադեղին, անվանի իրավապաշտպան Շիրին Էբդին և գահընկեց արքայի որդի Ռեզա Փահլավին:
*** Վտանգավոր այս վիրուսով վարակվել է նաև բրիտանացի լրագրող Ջոն Ըսնոն (Jon Snow). նա բրիտանական լրատվական 4-րդ ալիքի (Channel 4 News) լրագրող է և Իրանում մասնակցել է խորհրդարանական ընտրությունների լուսաբանման աշխատանքին: Այդ ընտրությունները կայացան 20 փետրվարին և հենց այդ օրվանից հայտարարվեց մահաբեր վիրուսի տարածման մասին:
*** Ուրբաթօրյա աղոթքների շտաբը բեկանել է վաղվա հասարակաց աղոթքների արարողությունը. փակ են դպրոցները, բարձագույն ուսման հաստատությունները, կինոթատրոնները, մարզական միջոցառումներն ու այլ հանրային հանդիսությունները:
Տիգրան Դավթյան
