Սումգայիթի, ինչպես նաեւ՝ Բաքվի եւ Գանձակի հայերի ջարդերի հեղինակներին ներկայումս ՄԻԵԴ-ում իրավական պատասխանատվության կանչելու հիմքերը փոքր են՝ հաշվի առնելով հանցագործությունների վաղեմության ժամկետը: Այս մասին այսօր «Օրբելի» վերլուծական կենտրոնում տեղի ունեցած քննարկման ժամանակ անդրադառնալով Սումգայիթի հայերի ջարդերի 32-րդ տարելիցին՝ ասաց փաստաբան, միջազգային իրավունքի փորձագետ Արա Ղազարյանը:
Հիշեցնենք, որ փետրվարի 27-ը Ադրբեջանական ԽՍՀ-ում 1988թ.-ին կազմակերպված Սումգայիթի ջարդերի զոհերի հիշատակի և բռնագաղթված հայ բնակչության իրավունքների պաշտպանության օրն է:
https://www.facebook.com/aravot.am/videos/512768626091452/
«ՄԻԵԴ-ում հարց կծագի, թե ինչու ենք այդքան սպասել: Չգիտեմ ինչու, բայց դա չի արվել, իսկ այսօր գրեթե հնարավորություն չկա: Տեսականորեն կա մի հնարավորություն: Փաստարկները կարելի է օգտագործել որպես ապացույցներ, եթե պետությունը դիմի պետության դեմ՝ ՄԱԿ-ի արդարադատության միջազգային դատարանում: Վաղ, թե ուշ, Ադրբեջանը եւ ՀՀ-ն հանդիպելու են այդտեղ, հիմնականում՝ ռասիզմի հիմքով: Ադրբեջանը պետականորեն ռասիստական քաղաքականություն է իրականացնում հայերի հանդեպ: Կարելի է միջպետական գանգատի շրջանակում ներկայացնել սումգայիթյան ջարդերը, ապրիլյան դեպքերը»,-նշեց Արա Ղազարյանը:
Կարդացեք նաև
Նրա խոսքով՝ ըստ ՄԱԿ-ի ներկայիս մոտեցման՝ ջարդարարությունները ցեղասպանական գործողություններ են, ատելության շարժառիթի դրսեւորումներ, որոնց նպատակը հայերին ահաբեկելն է:
Փորձագետը կարծում է, որ ՀՀ-ն Ադրբեջանի ջարդարարություններին պետք է իրավական եւ քաղաքական գնահատական տա: Սումգայիթյան ջարդերի փաստագրական տվյալները՝ http://karabakhrecords.info/ -ում:
Լուիզա ՍՈՒՔԻԱՍՅԱՆ
