«Փորձաքննության արդյունքում պարզվել է, որ ես չէի կարող կանխարգելել այդ վթարը: Մասնագետը, օգտագործելով ելակետային տվյալներ, եկել էր եզրահանգման, որ ես չէի կարող կանխարգելել այն»,-լրագրողների հետ զրույցում այսօր ասաց Պետական վերահսկողական ծառայության լիազորությունները կասեցված պետ Դավիթ Սանասարյանը՝ անդրադառնալով տեղեկություններին, որ ինքը 2019թ.-ին երեխայի է վրաերթի ենթարկել:
«Ոչինչ չի փոխվել՝ ես եմ տեսել, որ երեխան ցատկել է իմ մեքենայի ուղղությամբ: Ես երեխային չեմ հարվածել իմ մեքենայով, նա է դիպչել եւ ընկել, որի հետեւանքով ինձ համար կասկածելի պայմաններում ստացել է վնասվածք»,-նշեց Դավիթ Սանասարյանը: Նրա փոխանցմամբ՝ փորձաքննությունն ապացուցել է իր անմեղությունը, եւ քրեական գործը կարճվել է:
Հիշեցնենք, որ ավելի վաղ փաստաբան Տիգրան Աթանեսյանը ՖԲ իր էջում անդրադարձել էր Դավիթ Սանասարյանի համանման պնդումներին, թե փորձաքննությունն ապացուցել է իր անմեղությունը. «Ես երեխային մեքենայի տակ չեմ գցել, երեխան իր անզգուշության արդյունքում կողքից դիպչել է մեքենայիս ու վայր ընկել»: Տիգրան Աթանեսյանը մասնավորապես գրել էր. «Որպես անչափահաս տուժողի ներկայացուցիչ պետք է հանրությանը հայտնեմ հետևյալը՝
Կարդացեք նաև
Քրեական գործի նյութերով ոչ թե հերքվել է, այլ հաստատվել է Դ. Սանասարյանի կողմից անչափահաս Ա.Ղ.-ին վրաերթի ենթարկելու փաստը: Դատաավտոտեխնիկական փորձաքննության եզրակացությունը պարզապես գտել է, որ նա տեխնիկական տեսակետից հնարավորություն չի ունեցել կանխելու վրաերթը: Այդ եզրահանգման հետ տուժող կողմը չի համաձայնվել, հարցաքննվել է փորձագետը, այնուհետև միջնորդություն է ներկայացվել լրացուցիչ փորձաքննություն նշանակելու մասին, ինչը հավանաբար, դատելով Դ. Սանասարյանի գրառումից, մերժվել է, իսկ քրեական գործի վարույթը կարճվել է: Որոշումը տուժող կողմը չի ստացել, ստանալուն պես այն կբողոքարկվի:
Հիշեցնեմ, որ վրաերթի հետևանքով անչափահաս Ա.Ղ-ն ստացել է միջին ծանրության մարմնական վնասվածքներ:
Հ.Գ. Ավելի մանրամասն իրավիճակը, այն է՝ դատաավտոտեխնիկական ոլորտի փորձագետի տարօրինակ և անհասկանալի մոտեցումները, կներկայացնեմ հետագայում՝ որոշումը ստանալուց հետո»:
Լուիզա ՍՈՒՔԻԱՍՅԱՆ
