«Խոջալուի դեպքերը կապված էին նաեւ Ադրբեջանում առկա ներքաղաքական խնդիրների հետ»,- այս մասին այսօր «Պոստ Սկրիպտում» մամուլի ակումբում ասաց «Օրբելի» կենտրոնի ադրբեջանական հարցերի փորձագետ Տարոն Հովհաննիսյանը։
«1992թ. մարտի 5-ին Ադրբեջանի նախագահ Այազ Մութալիբովը Խոջալուի միջադեպից հետո հրաժարական տվեց, եւ նրա դեմ օգտագործվեց հենց այս հանգամանքը»,- հավելում է նա։
«Պետք է նշեմ նաեւ, որ Խոջալուի դիրքերը այդ ժամանակահատվածում վերահսկում էին Մութալիբովի ընդդիմադիր ճակատի ստորաբաժանումները։ Եւ հարցազրույցներից մեկում Մութալիբովը նշել էր, որ ընդդիմությունը դա արել էր իր դեմ օգտագործելու համար։ Բայց նա հիմա հերքում է այդ փաստը»,- ասաց Տ. Հովհաննիսյանը։
Ըստ նրա շատերը փրկվեցին՝ հանձնելով հայերին. «Խոջալուի մոտ 700 խաղաղ բնակիչ հայերի շնորհիվ անվտանգ անցել է Ադրբեջանի կողմ: Ստեփանակերտում բլոկադայի պատճառով սնունդը քիչ էր. այդ մարդկանց պահելու հնարավորություն չկար»:
Կարդացեք նաև
«Եթե նպատակ լիներ Խոջալուի խաղաղ բնակչությանը սպանելու, ինչո՞ւ պետք է Լեռնային Ղարաբաղի ինքնապաշտպանական ուժերը 10 կմ կտրեին՝ այդտեղ հասնելու համար, առավել եւս, որ դա վերահսկվում էր ադրբեջանական ուժերի կողմից»,- ասաց փորձագետը։
Նա նաեւ նշում է, որ այդ անձինք սպանվել են Խոջալուից շուրջ տասը կիլոմետր հեռավորության վրա, Աղդամի ադրբեջանական դիրքերից՝ 700 մետր հեռավորության վրա, սա փաստել էր նաև ադրբեջանական INS հեռուստաընկերության լրագրող Չինգիզ Մուսթաֆաևը թե՛ տեսանյութով, թե՛ իր հայտարարությամբ։
Հիշեցնենք, որ 1992 թվականի փետրվարի 25-26-ը Խոջալուի և Աղդամի մերձակայքում տեղի ունեցած իրադարձությունների օրն է։
Մանրամասները՝ տեսանյութում:
Նոնա ՂԱԶԱՐՅԱՆ
