Խոջալուի դեպքերի շուրջ Ադրբեջանի զեղծարարությունների և քարոզչության մասին այսօր «Պոստ Սկրիպտում» մամուլի ակումբում խոսեց «Օրբելի» կենտրոնի ադրբեջանական հարցերի փորձագետ Տարոն Հովհաննիսյանը:
«Ադրբեջանական կողմը մեծ քարոզչական աշխատանք է տանում, որ փորձի ապացուցել, թե ամեն ինչում հայկական կողմն է մեղավոր. իրականում իրենք փորձում են հաճոյանալ Թուրքիային ասելով, որ Հայաստանը ցեղասպանություն է գործել, բայց հայկական կողմը մեծ աշխատանք է տանում ադրբեջանական քարոզչական տեսանյութերի, փաստերի խեղաթյուրումը բացահայտելու ուղղությամբ»,- նշեց փորձագետը:
«Ադրբեջանցի լրագրող Չինգիզ Մուստաֆաևը, փետրվարի 28-ին լուսանկարել է մահացածների դիակները. օրեր անց մարտի 3-ին արված լուսանկարներից պարզ է դարձել, որ այդ օրերի ընթացքում բազմաթիվ դիակներ խոշտանգել են, տեղաշարժել. դիակները պղծվել են, որ ավելի ահասարսուռ պատկեր ստանան ու հայերին մեղադրեն: Ադրբեջանը բազմաթիվ անգամներ մահացածների ցուցակը կեղծել է: Մոտ 5 անգամ կազմել են ցուցակ՝ որտեղ մի քանի անգամ կրկնվում է նույն անունը, ադրբեջանցիների հետ կապ չունեցող մարդկանց անուններ են գրվել՝ հույս ունենալով, որ հայերը չեն ստուգելու ցուցակները: Ադրբեջանը օգտագործում է կեղծ ֆոտոներ, որոնք ընդհանրապես կապ չեն ունեցել Խոջալուի դեպքերի հետ, դրա վառ օրինակը՝ վերջերս հրապարակված նկարն է, որը նկարվել է Պարսկաստանում և կապ չունի Խոջալուի դեպքերի հետ»,-հավելեց Տարոն Հովհաննիսյանը:
Նոնա ՂԱԶԱՐՅԱՆ
