ԱԺ առողջապահության եւ սոցիալական հարցերի հանձնաժողովում այսօր քննարկվեց «Իմ քայլը« խմբակցության պատգամավոր Սիսակ Գաբրիելյանի հեղինակած՝ «Դեղերի մասին» ՀՀ օրենքում փոփոխությունների օրինագիծը, որով առաջարկվում է թույլատրել փոստային ծառայության միջոցով արտասահմանից որեւէ դեղամիջոց ուղարկել ՀՀ: Ինչպես նշեց Սիսակ Գաբրիելյանը, օրինագծի անհրաժեշտությունը ծագում է հետեւյալ խնդրից. «ՀՀ եկող եւ ՀՀ-ից մեկնող քաղաքացիներն իրենց հետ կարող են տեղափոխել անձնական օգտագործման դեղերը, մինչդեռ փոստային առաքմամբ դեղ ստանալն արգելվում է: Եթե քաղաքացին արտերկրից ծանրոց է ստանում, որի մեջ նաեւ դեղ կա, ծանրոցն իրեն չի տրամադրվում: Նա գնում է մաքսային մարմին, որտեղ ուղեբեռը քանդվում է, դեղը՝ ոչնչացվում:
Առաջարկում ենք թույլատրել փոստով դեղ ուղարկել ՀՀ: Սա շատ կօգնի քաղաքացիներին, որոնք սոցցանցում հաճախ են գրում, որ այս կամ այն դեղն է անհրաժեշտ բերել արտերկրից: Ներկայում երկրի սահմանը ֆիզիկապես հատելու դեպքում թույլատրվում է մինչեւ 30 տուփ դեղ փոխադրել, իսկ փոստայինի դեպքում առաջարկում ենք սահմանել 3-5 տուփ՝ ամսվա մեջ մեկ անգամ միայն: Դա կառավարությունը կորոշի: Մաքսային ծառայությունը կֆիքսի, թե քաղաքացին ամսվա ընթացքում որքան եւ ինչ դեղ է ստանում, ինչը չես ասի ֆիզիկապես սահմանահատման դեպքում դեղերի ապօրինի շրջանառության մասին: 200 եվրոն գերազանցող դեղերը հարկվելու են»: Սիսակ Գաբրիելյանը հավելեց, որ իր առաջարկած օրինագիծը գործում է ԵՏՄ այլ երկրներում: Հավելենք, որ օրինագիծը դեռեւս պետք է քննարկվի ԱԺ լիագումար նիստում:
Լուիզա ՍՈՒՔԻԱՍՅԱՆ
