Արարատի մարզպետը, ավելի կոնկրետ մարզպետարանը մի շարք դատական գործընթացների մեջ է: Մարզպետ Գարիկ Սարգսյանն այսօր «Արմենպրեսի» մամուլի սրահում ասաց՝ 5 դատական գործ կա. «Հիմնականում այն մեր աշխատակիցներն են, որոնց ազատել ենք աշխատանքից: Ունենք հայցեր, որոնցով պահանջում ենք, որպեսզի անհապաղ քրեական գործ հարուցեն»:
Սարգսյանը ներկայացրեց հայցերից մեկի պատմությունը: Մարզի բուժկենտրոններից մեկի տնօրենը, մարզպետի պատմելով, տարիներ շարունակ ինքնագործունեությամբ է զբաղվել, եւ առանց հիմնադրի թույլտվության, այսինքն` առանց մարզպետի որոշման, իր աշխատավարձը բարձրացրել է ու տարիներ շարունակ աշխատավարձ է ստացել պայմանագրում նշվածից ավելի գումար: Հիմա մարզպետարանը դիմել է դատարան եւ պահանջում է տնօրենի նկատմամբ քրեական գործ հարուցվի, պատճառված վնասն էլ վերականգնվի:
Մյուս դատական գործն առավել ուշագրավ է. Ավշար համայնքի ղեկավարը, ինչպես պատմեց մարզպետը, պետական գույքը դարձրել է համայնքային, ապա՝ իրացրել:
Ավշարի համայնքապետը դպրոցի հին եւ մեծ շենքը համայնքային դարձնելուց հետո աճուրդով վաճառել է իր վարորդին, վարորդն էլ՝ համայնքապետի աղջկան, հետո համայնքապետը գույքի վարձակալության պայմանագիր է կապել իր աղջկա հետ. «Համայնքապետը ներկայացնում է իբրեւ թե կարատեի խմբակ է գործել, ծախսն արդարացված է, բայց մեզ համար կարեւորը՝ գույքը վերադարձվի»:
Կարդացեք նաև
Սարգսյանն ասաց, որ այս շենքի մասին հայտարարությունը նկատել են list.am-ում, որտեղ դպրոցի հին շենքը վաճառքի է հանվել 240 հազար դոլարով:
Նելլի ԲԱԲԱՅԱՆ
