«Օտարերկրացիների մասին» օրենքում ԱԺ փոխնախագահ Ալեն Սիմոնյանն առաջարկում է փոփոխություն կատարել: Խնդրի են հանդիպել ֆուտբոլ մարզաձեւում:
Այսօր ԱԺ գիտության, կրթության, մշակույթի, սփյուռքի, երիտասարդության եւ սպորտի հարցերով հանձնաժողովի նիստում նախագծի քննարկման ժամանակ Ալեն Սիմոնյանն ասաց, որ ֆուտբոլ մարզաձեւում օտարերկրացի այն մարզիկները, ովքեր ունեն սիրողական կամ պրոֆեսիոնալ մարզավիճակ եւ պատրաստվում են գործատուի հետ պայմանագիր կնքել, կազմակերպությունները կարող են շրջանցել բոլոր բյուրոկրատական խնդիրները: Խոսքն այս պահին պրոֆեսիոնալ ֆուտբոլիստների մասին է. «Գործող օրենքով ստացվում է, որ եթե աֆրիկական երկրից, Ֆրանսիայից մի ֆուտբոլիստ ենք ուզում գնել, պետք է զբաղվածության կենտրոնից մի հատ ճշտենք՝ մենք պրոֆեսիոնալ ֆուտբոլիստ ունե՞նք, որն ուզում է գործի տեղավորվել, աբսուրդ է»:
Ըստ Ալեն Սիմոնյանի, ֆուտբոլային ակումբը չի կարողանում «աշխատանքային տրանսֆերով» պայմանագիր կնքել իքս երկրի հետ, որ նա խաղա տեղական թիմում: Բանը հասնում է նրան, որ Վրաստանի ինչ-որ կազմակերպություններ պետք է կնքեն, նոր տեղափոխեն, ինչը բարդություններ է առաջացնում եւ ազդում սպորտի բնագավառում նվաճումների, որակի վրա. «ՀՀ-ում գործող բոլոր ֆուտբոլային ակումբները խնդրում էին հնարավորինս շուտ միաձայն ընդունել այդ օրինագիծը»:
Հարակից զեկուցող, հանձնաժողովի անդամ Արսեն Ջուլֆալակյանն ասաց, որ եթե մենք ենք ուզում տրանսֆերով ֆուտբոլիստ առնել, 15-20 օրում դա կանեն, իսկ մերոնք՝ ոչ: Խնդիրներից մեկն այն է, որ մերոնք մեկ տարվա պայմանագիր են կնքում, ոչ թե 5 տարվա, ինչպես շատ այլ երկրներում: Դա իջեցնում է մարզիկի գինը, ֆինանսական հարցեր է առաջացնում:
Կարդացեք նաև
Նախագիծը դրական եզրակացություն ստացավ:
Հռիփսիմե ՋԵԲԵՋՅԱՆ
Հարգելի Առավոտ
Նյութի առաջին երկու նախադասությունը հայերեն բառեր են, բայց հայերեն միտք չի:
«Օտարերկրացիների մասին» օրենքում ԱԺ փոխնախագահ Ալեն Սիմոնյանն առաջարկում է փոփոխություն կատարել:
Խնդրի են հանդիպել ֆուտբոլ մարզաձեւում:
1000 անգամ կարդացի ու չհասկացա, ՕՐԵՆՔՈՒՄ ԱԺ ՓՈԽՆԱԽԱԳԱՀ??? Կամ ինչ խնդիր???? ոչ առաջին, ոչ երկրորդ նախադասություններում խնդիր նշված չէ:
Հարգելի Նարեկ, շնորհակալ ենք արձագանքելու համար: Ընդհանրապես պարտադիր չէ, որ խնդիրը նշվի հենց առաջին կամ երկրորդ նախադասության մեջ, նյութի կառուցվածքը որոշում է հեղինակը: Տվյալ դեպքում խնդիրը ներկայացված է՝գործող օրենքով բյուրոկրատական քաշքշուկներ կան, որոնք նախագծի ընդունման պարագայում կչեզոքացվեն: Շնորհակալություն
Հարգելի Հռիփսիմե շնորհակալություն արձագանքելու համար
Ես մտադիր չեմ որոշել ձեր նյութի կառուցվածքը, ուղղակի հայերենի օրենքներն իմանալով պնդում եմ, որ ձեր նյութի առաջին երկու նախադասությունը հայերենի օրենքներից դուրս են: Եվ եթե ասում եք, որ խնդրի են հանդիպել, պիտի ասեք ինչ խնդիր: Նյութից տպավորություն եմ ստանում, որ ընկել են արագ թողարկելու՝ ժամանակի հետեւից ու 100-րդ պլան մղել որակը: