Լույս է տեսել գրող, հրապարակախոս, անդրանիկագետ Ռուբեն Սիմոնյանի «Օտարներն Անդրանիկի մասին» նոր գիրքը: Փետրվարի 24-ին «Տեսակետ» ակումբում Անդրանիկի ֆենոմենի մասին խոսեցին եւ հեղինակը, եւ Ե. Չարենցի անվան գրականության և արվեստի թանգարանի տնօրեն Կարո Վարդանյանը:
Կարո Վարդանյանը հիշեց Վահան Թոթովենցին, որը 1920 թ Լեւոն Թութունջյանի հետ համատեղ մի աշխատություն է հրատարակել «Զորավար Անդրանիկը եւ իր պատերազմները»` Արսեն Մարմարյան ստորագրությամբ, որի վերջաբանում Թոթովենցը պատկերավոր միտք ունի . «Մեր գրականության մեջ միայն մեկ բանը, որ Անդրանիկին համահավասար երգված է, արյունն է: Եվ սա հստակ է»:
Կարո Վարդանյանը նշում է, որ այսօր էլ ստեղծվում են Անդրանիկի մասին երգեր: Եվ նա միակ հերոսն է, որին ձոնվել են երգեր կենդանության օրոք եւ ոչ թե հետմահու. «Անդրանիկի ծննդյան 155-ամյակը հրաշալի առիթ է. որպեսզի փորձենք քիչ թե շատ ամփոփ Անդրանիկ ներկայացնել մեր լայն հանրությանը: Անդրանիկի անունը ամեն հայ գիտի, օտարներն էլ գիտեն, եւ նրա անունն ասոցացվում է խիզախության ու քաջության հետ»:
Մանրամասն` տեսանյութում
Կարդացեք նաև
Նա անդրադարձավ նաեւ Թումանյանի ու Անդրանիկի մտերմությանը, որոնց Կարո Վարդանյանի խոսքերով, ժողովուրդը հայրական իրավունքներով էր օժտել: «Իր վաստակով եւ վիթխարի լինելով Անդրանիկի հետ կարող ենք համեմատել միայն Մաշտոցին ու Կոմիտասին…Շահնուրն ասում էր, որ ժողովուրդն իր հազարամյա պատմության ընթացքին ավելի մեծ բանն չի ունեցել, քան Մաշտոցը, Կոմիտասը եկեղեցին եւ Անդրանիկը: Այս համոզումը մեր բոլոր խոշորներն են ունեցել»,-փաստում է Ե. Չարենցի անվան գրականության և արվեստի թանգարանի տնօրենը:
Մանրամասն` տեսանյութում
Ռուբեն Սիմոնյանը հավերժի զավակ է որակում Անդրանիկին: «Անդրանիկը հենց սկզբից առասպելի հերոս է դարձել…Նա ասում էր, որ իր հայրենի կուսակցությունն իր ժողովուրդն է…Եվ ինչպես ինքն է վերաբերվել իր ժողովրդին, այդպես էլ ժողովուրդն է փոխադարձել նրան, պաշտել է իր հերոսին»,-ասում է նա:
«2015թ. Անդրանիկի ծննդյան 150-ամյակը Հայաստանի այն օրվա իշխանությունների եւ այն ժամանակ իշխող կուսակցության մեղքով չնշվեց իր պաշտելի հայրենիքում»,-նշեց Սիմոնյանը, որ Անդրանիկի մասին 4 գիրք ունի գրած:
Ինչ վերաբերում է նորատիպ գրքին, վերջինիս մասին էլ ասաց, որ այս գրքում կարելի է գտնել բուլղարացիների, ռումինացիների, հույների, ֆրանսիացու, ամերիկացու, ռուսների, վրացիների կարծիքներ` Անդրանիկի մասին: «Անգամ Աթաթուրքի բարձր գնահատականը կա մեր պաշտելի Անդրանիկի մասին»:
Գոհար ՀԱԿՈԲՅԱՆ
