«Երևույթը շատ դրական է, որ մենք կարող ենք միասին նստել և բաց զրույցի մեջ քննարկել հարցեր»,- փետրվարի 24-ին Սլովակիայի արտաքին և եվրոպական գործերի նախարար Միրոսլավ Լայչակի հետ համատեղ ասուլիսին հայտարարեց ՀՀ ԱԳ նախարար Զոհրաբ Մնացականյանը՝ անդրադառնալով հարցին՝ ո՞վ էր ընտրել Մյունխենում Փաշինյան-Ալիև հանդիպման ձևաչափը:
Անդրադառնալով քննադատություններին՝ Զոհրաբ Մնացականյանն ասաց, որ այդ հանդիպման արդյունքները գնահատել են իրենք՝ երկրների ղեկավարները: Նա վստահեցրեց՝ մյունխենյան հանդիպումը նաև այն ուղղության մեջ է, որը վերաբերում է միջավայրի ձևավորմանը: Զոհրաբ Մնացականյանը հիշեցրեց, որ անցյալ տարի ունեցել ենք իր ձևակերպմամբ՝ համեստ արդյունք, որը լրագրողների փոխանակության արդյունքն է և մանրամասնեց. «Դա հնարավորություն է տալիս, և մենք կարող ենք շարունակել աշխատել այդ ուղղությամբ: Յուրաքանչյուր հատված կարող է ունենալ իր դերակատարությունը: Կարծում եմ այն փաստը, որ ղեկավարները միասին բաց ֆորմատով կարող են նստել և առնչվել, լավ օրինակ է»:
Ըստ ՀՀ ԱԳ նախարարի՝ Փաշինյան-Ալիև՝ մյունխենյան հանդիպման հարցում մտահոգիչ խնդիր է միգուցե մեր համակարգերի տարբերությունը: Նա պարզաբանեց. «Այն մեկնաբանությունները, որոնք ես տեսա ադրբեջանական մամուլում կամ Ադրբեջանի տարբեր պաշտոնյաների կողմից, դրանք պրոպագանդիստական ծայրահեղ մակարդակի են հասցված և հիշեցնում էին մոդելներ, որոնք բնավ ժողովրդավարական կամ ազատ քննարկման համակարգի բացակայության արտահայտություն են: Դրանք, մեղմ ասած, օգտակար չեն, ավելի պարզ ասած անընդունելի են»:
Զոհրաբ Մնացականյանը նկատեց՝ մեր հասարակության մեջ քննարկումներն ավելի բաց են և հնարավորություն են տալիս, որ միասին գնահատենք այս կամ այն իրադարձությունն ու զարգացումը:
Կարդացեք նաև
Լրագրողների փաստմանը՝ ՀՀ վարչապետ Նիկոլ Փաշինյանը իր և Արցախի նախագահ Բակո Սահակյանի համանախագահությամբ Ստեփանակերտում տեղի ունեցած Հայաստանի և Արցախի Անվտանգության խորհուրդների համատեղ նիստին օգտագործեց մյունխենյան սկզբունքներ արտահայտությունը և հարցին՝ դրանք փաստաթղթի տեսք ստացե՞լ են, բանակցային սեղանի՞ն են, եթե այո, նախկին սկզբունքները չեղարկվո՞ւմ են, Զոհրաբ Մնացականյանը պատասխանեց. «Մյունխենյան սկզբունքներ ասելով՝ վարչապետի կողմից արտահայտվեց ավելի համապարփակ կերպով այն, ինչ խոսվեց Մյունխենում: Դրանք համալրում են մեր մոտեցումները, դրանց մեջ չի արտահայտվում որևէ բան, որը վերաձևավորում է մեր ձևավորած մոտեցումը ԼՂ հակամարտության խաղաղ կարգավորման ընդհանուր մոտեցումներում: Հարցնում են՝ արդյոք կարգավորման հարցում երկրորդ պլա՞ն է մղվում ինքնորոշման իրավունքը, իհարկե՝ ոչ: Այն չի կարող անտեսվել, անտրամաբանական է նման կերպ գնահատել: Մեր դիրքորոշումը մնում է կայուն, այն արտահայտվում է տարբեր ձևերով: Իսկ այս արտահայտությունը նաև համալրում է այն մոտեցումները, որոնք անկյունաքարային են և ունեն իրենց արտահայտման բոլոր հնարավոր ձևաչափերը:
Ինչ վերաբերում է հարցին՝ արդյոք նախորդ մոտեցումներին ՀՀ-ն հավատարի՞մ է, ապա նշեմ, որ Հայաստանը հարցի խաղաղ կարգավորման՝ Մինսկի խմբի համանախագահության շրջանակներում շարունակում է աշխատանքը այնպիսի լուծումների համար, որոնք ինչպես վարչապետ Փաշինյանն արտահայտվեց նաև Մյունխենում, վստահաբար առաջին անգամ չէինք լսել: Մասնավորապես այն, որ մենք կողմնակից ենք լուծումների, որոնք ընդունելի են բոլոր կողմերի համար, ինչը նշանակում է ճանապարհ, որն ունի երկու ուղղություն, և միակողմանի զիջումներ երբեք լինել չեն կարող: Այդ առումով մեզ համար ամենասուր հարցը մնում է ԼՂ մեր հայրենակիցների իրական անվտանգության համակարգի ապահովումը, որից բխում է ստատուսի խնդիրը: Խնդրում եմ չխառնել և չենթադրել, որ մեկը մյուսից տարանջատված են: Մյունխենյան սկզբունքները համալրում է, արտահայտում է այս կերպ այն դիրքորոշումները, որոնք ձևավորվել են Հայաստանի կողմից, որոնց շուրջ մենք աշխատում ենք մինսկի խմբի համանախագահության շրջանակներում»:
Տաթև ՀԱՐՈՒԹՅՈՒՆՅԱՆ
