Երեւանում այսօր մեկնարկել է ՀՅԴ Հայ Դատի հանձնախմբերի եւ գրասենյակների խորհրդաժողովը: Խորհրդաժողովի աշխատանքները կշարունակվեն չորս օր: Վաղվանից դրանք անցկացվելու են Ստեփանակերտում։ Օրակարգում են Արցախի հանրապետության անկախության ճանաչման, Հայոց ցեղասպանության միջազգային ճանաչման, Լեռնային Ղարաբաղի հակամարտության կարգավորման եւ այլ հարցեր:
Լրագրողների հետ զրուցում անդրադառնալով Լեռնային Ղարաբաղի հակամարտության կարգավորման բանակցություններին, ՀՅԴ Բյուրոյի ներկայացուցիչ Հակոբ Տեր-Խաչատուրյանն ասաց, որ ՀՀ կառավարության որդեգրած քաղաքականության վերաբերյալ մոտեցումները տարբեր են, բայց նաեւ, որպեսզի բանակցություններ տեղի ունենան, իր կարծիքով, անհրաժեշտ է տարբեր այլընտրանքների մասին խոսել. «Դա չի նշանակում, որ տարբեր այլընտրանքներն ընդունելի են, բայց նշանակում է, որ Մինսկի խմբի համանախագահների հսկողության ներքո այդ բանակցությունները պետք է ընթանան»:
Անդրադառնալով Մյունխենի անվտանգության համաժողովում Հայաստանի վարչապետ Նիկոլ Փաշինյանի եւ Ադրբեջանի նախագահ Իլհամ Ալիեւի բանավեճին, մասնավորաբար, վարչապետի այն թեզին, թե ԼՂ հիմնահարցի լուծումը պետք է ընդունելի լինի երեք կողմերի համար, Հակոբ Տեր-Խաչատուրյանն ասաց, որ համաժողովին հնչել են ընդհանրական հասկացողություններ. «Հնչեց մի քանի հասկացողություն, որոնց մանրամասների պարագայում մենք ունենք անհամաձայնություններ, բայց երբ համաշխարհային ֆորումին բանակցում ես, վերջիվերջո եթե լուծման պետք է հանգես, այդ պետք է ընդունելի լինի բոլորին. եթե՝ ոչ, ուրեմն լուծում չի, կամ էլ պարտադրված լուծում պետք է լինի, որը կնշանակի՝ հստակորեն պետք է մեկ կողմի ունեցած նկատառումները պարտադրվի»։ Այդ իմաստով, նա Նիկոլ Փաշինյանի հայտարարությունը «բաղձանք» է որակում` հասնել այնպիսի լուծման, որ երեք ժողովուրդներն էլ ընդունեն:
Նա նաեւ նկատեց` ինչ արդյունք էլ լինի բանակցություններում, այն պետք է դրվեն հանրաքվեի, որպեսզի Հայաստանի, Արցախի ժողովուրդները, ենթադրում է նաեւ Ադրբեջանինը, տան իրենց վավերացումը:
Կարդացեք նաև
ՀՀ իշխանությունների`Արցախի հարցում մոտեցումների մասով իրենց անհամաձայնությունների շուրջ, բանախոսը չցանկացած խոսել: Մի բան միայն հստակեցրեց` «Ինչ լուծում էլ լինի, այդ լուծման մեջ չպետք է լինեն որեւէ տեսակի զիջումներ»:
Նելլի ԳՐԻԳՈՐՅԱՆ
