«Գնահատման եւ թեստավորման կենտրոնի տվյալներով՝ «Հայոց լեզու» առարկայի կենտրոնացված քննություններում 31021 սովորողից 1686-ը ստացել է անբավարար գնահատական։ 19-20 միավոր ստացել է միայն 152 աշակերտ»,-«Բարձրագույն կրթության եւ գիտության ոլորտի օրենսդրական բարեփոխումներն ու հիմնախնդիրները» թեմայով խորհրդարանական լսումների ժամանակ այսօր հայտարարեց ԲՀԿ պատգամավոր Նաիրա Զոհրաբյանը:
«Այս տարի «Հայոց լեզու և հայ գրականություն» առարկայի միասնական քննություն հանձնած 4540 դիմորդից անբավարար, այսինքն՝ խայտառակ գնահատական ստացել է 1160-ը։ Գիտենք, թե դպրոցում ինչ մակարդակով են ուսուցանվում ոչ միայն լեզուն եւ գրականությունը: Սայլը մի դրեք ձիուց առաջ: Եկեք նախ հանրակրթական դպրոցներում ապահովենք լեզվի այն մակարդակը, որ քննության ժամանակ լուրջ տեսքով չասեն՝ «Նապոլեոնը տորթ ա», «Սասունցի Դավիթն էլ՝ արձան»: Ապահովենք այնպիսի մակարդակ, որ հանրության 80 տոկոսի համար «մեղանչել» բառը համառորեն չասոցացվի «ապաշխարել» բառի հետ»,-նշեց Նաիրա Զոհրաբյանը:
Լուիզա ՍՈՒՔԻԱՍՅԱՆ
