Ոստիկանության բարեփոխումների արդյունքում նոր պարեկային ծառայություն ստեղծելուց հետո կադրային ջարդ չի լինելու: Այսօր այս մասին ոստիկանության բարեփոխումների 2020-2022 թվականների ռազմավարության հանրային քննարկման ընդմիջմանը լրագրողների հետ զրույցում ասաց ոստիկանության պետի տեղակալ Տիգրան Եսայանը: Նա ասաց. «Արվելու է առավելագույնը, որպեսզի այն կադրերը, որոնք այսօր աշխատում են՝ մնան ծառայությունում: Բոլոր նրանք, ովքեր մասնագիտական հմտություններով կհամապատասխանեն նոր ներկայացվող պահանջներին, կմնան եւ կաշխատեն: Ինչ վերաբերում է նրանց, ովքեր դուրս կմնան, նրանք կտեղավորվեն ոստիկանության այլ ծառայություններում»:
Անդրադառնալով ռազմավարությամբ նախատեսված ոստիկանության գործառույթների փոփոխություններին եւ նախաքննության գործառույթի փոփոխությանը՝ Եսայանն ասաց. «Այսօր ոստիկանությունն իրականացնում է օպերատիվ հետախուզական եւ հետաքննական գործառույթներ: Սրանք նոր օրենսդրությամբ պետք է չլինեն, պետք է փոխարինվի նոր ինստիտուտով, եւ սա ողջունելի է: Խոսքը դետեկտիվների ինստիտուտի մասին է, որտեղ պետք է համակցվեն օպերատիվ եւ քննչական ֆունկցիաները, որը կիրականացնի մի ծառայողը: Սա կնպաստի հանցագործությունների ավելի արագ ու լիարժեք ապացույցների ձեռքբերմանն ու հավաքմանը՝ տաք հետքերով հանցագործության բացահայտմանը»:
Նոր ռազմավարությամբ մեկ այլ փոփոխություն էլ վերաբերում է ռազմական ոստիկանությանը, եւ ինչպես ասաց Եսայանը, ապառազմականացման հարցն է քննարկվում. «Դա չի նշանակում, որ ոստիկանության զորքերը դառնալու են քաղաքացիական ծառայողներ: Նոր նախագծով դա ազգային գվարդիա կոչվածն է, որը զբաղվելու է ոստիկանությանը բնորոշ հասարակական կարգի եւ կարեւորագույն օբյեկտների պահպանությամբ, ոչ թե ասենք՝ սահմանների պաշտպանության»:
Փոխոստիկանապետն ասաց, որ պիլոտային ծրագրով արդեն տեսախցիկներով կահավորվել են ոստիկանության 10 ստորաբաժանումներ, կան ստորաբաժանումներ, որտեղ նախատեսվածից ավելի շատ տեսախցիկներ են տեղադրել: Մինչեւ 2013 թվականը ՀՀ ոստիկանության բոլոր ստորաբաժանումներում կտեղադրվեն այդ տեսախցիկները:
Քրեական ենթամշակույթի դեմ պայքարի մասին էլ Եսայանն ասաց՝ ոստիկանությունը հաշվառում է քրեական ենթամշակույթին կրող քաղաքացիներին, պայքարն էլ ընթանում է,իր խոսքերով ասած՝ այդ կոնտինգենտի մարդկանց տեսակն ու քանակը հաշվի առնելով եւ համապատասխան մեթոդներն ընտրելով: Օրենքն, ըստ փոխոստիկանապետի, կօգնի ավելի արդյունավետ պայքարել:
Նելլի ԲԱԲԱՅԱՆ
