Այսօր ոստիկանության բարեփոխումների 2020-2022 թվականների ռազմավարության շուրջ հանրային քննարկում է ընթանում: Քննարկման մասնակիցներից «Իրավունքների պաշտպանություն առանց սահմանների» ՀԿ նախագահ Արաքս Մելքոնյանն այս ռազմավարության մասին ասաց՝ կարեւոր է հասկանալ ոստիկանության դերը քրեական արդարադատության համակարգում.«Ռազմավարությամբ հիմա ենթադրվում է քրեական ոստիկանության ստեղծման հնարավորություն, այս իմաստով կարեւոր է հասկանալ քրեական ոստիկանության դերն այդ համակարգում, պետք է հասկանալ, թե ինչ տեսակի քրեական արդարադատություն է լինելու»:
Քննարկման մեկ այլ մասնակից՝ ԱԺ պաշտպանության եւ անվտանգության հարցերի մշտական հանձնաժողովի նախագահ Անդրանիկ Քոչարյանն էլ նկատեց՝ ոստիկանության բարեփոխումները դեռեւս 90-ականներին են եղել, եւ շարունակությունը եղել է ՆԳՆ կառուցվածքում մարզային կառավարման ոստիկանական օղակը. «Չմոռանանք՝ ոստիկանության բարեփոխումներ անվան տակ փորձել են լուծել այդ պահին իրեն վերապահված ուժային խնդիրները: Այսօրվա բարեփոխումը պետք է դառնա իրական բարեփոխում: Դրանք պետք է իրականացվեն հանրության հետ ակտիվ քննարկումների արդյունքում»: Քոչարյանի դիտարկմամբ՝ պետք է ունենանք այնպիսի իրավական համակարգ, որի օրինականության եւ իրականացվող քայլերի հետ կապված կասկածներ չլինեն:
«Իրազեկ քաղաքացիների միավորում» ՀԿ ծրագրերի համակարգող Դանիել Իոաննիսյանն էլ ասաց՝ ողջունելի է, որ այս ռազմավարությամբ չի լինելու պարեկային ծառայության, ՊՊԾ -ի եւ ՃՈ-ի միաձուլում:
Ընդհանուր ոստիկանության մասին խոսելիս, Իոաննիսյանն ասաց, որ այս համակարգին հանրությունը չի վստահում. «Մարդիկ չեն դիմում ոստիկանություն, որովհետեւի չեն ակնկալում, որ իրենց խնդիրը կլուծվի: Մարդիկ դիմում են տարբեր մեխանիզմների՝ քրեական հեղինակություններին, մեծ ախպերներին, ոմանք ոչ մեկին չեն դիմում: Կարեւոր է, որպեսզի ոստիկանն ընկալվի որպես ընկեր, ում կարող ես զանգել, երբ ունես խնդիր, ոչ թե մի քանի անգամ տանի-բերի բաժին, 7 հատ բացատրություն ուզի եւ վերջում խնդիրը չլուծի»:
Կարդացեք նաև
Իոաննիսյանի կարծիքով՝ կարեւոր է օպերատիվ կառավարման կենտրոնի հիմնումը՝ երկարաժամկետ իմաստով, որպեսզի բոլոր տեսակի հրատապ խնդիրների դեպքում մարդիկ զանգեն միեւնույն թեժ գծին, ինչպես ԱՄՆ-ում 911-ն է, եւ ստանան անհետաձգելի օգնությունն՝ անկախ նրանից, թե ինչ տեսակի օգնության են դիմում՝ հրշեջ, թե բժշկական: Բացի այս, ըստ Իոաննիսյանի, կարեւոր է նաեւ քրեական ոստիկանության ստեղծումը. «Մասնավորապես՝ ոստիկանության կազմակերպված հանցավորության դեմ գլխավոր վարչության՝ 6-րդ վարչության, քրեական հետախուզման վարչության միավորումը նույն վարչությունում, ինչը հնարավորություն կտա առավել արդյունավետ գործողություն ծավալել»:
Իոաննիսյանն ասաց, որ իրենք առաջարկում են վերանայել հատուկ միջոցների կիրառման կանոնակարգը, որովհետեւ 2016-ին ՊՊԾ գնդի գրավման ժամանակ խաղաղ ցույցերն ուսումնասիրելուց հետո նկատել են՝ հատուկ միջոցների կիրառման դեպքում բազմաթիվ խնդիրներ կան, օրինակ՝ լուսաձայնային նռնակների, արցունքաբեր գազի եւ ջրանետի կիրառումները:
«Նաեւ առաջարկում ենք քննարկման առարկա դարձնել ոստիկանության կողմից քննություն իրականացնել-չիրականացնելու հարցը: Սա ռազմավարության մեջ որոշակիորեն շոշափվում է»,-ասաց Իոաննիսյանը:
Նելլի ԲԱԲԱՅԱՆ
