Օլիմպիական խաղերի, աշխարհի ու Եվրոպայի չեմպիոն Արթուր Ալեքսանյանը 2019 թվականի 10 լավագույն մարզիկներ մրցույթի արդյունքում հաղթած մյուս մարզիկների հետ պարգևատրությունը ստանալուց հետո լրագրողների հետ հարցուպատասխանի ժամանակ ասաց, որ երբ պետությունը, երկրի վարչապետը եւ պետական այրերը գնահատում են մարզիկների չարչարանքը, արդյունքները, դա իրենց ոգեւորում է եւ պարտավորեցնում: «Տոկիոյի օլիմպիական խաղեր մեկնելու եմ երկրորդ օլիմպիական ոսկու համար: Ես միշտ նշել եմ, որ ինձ մոտիվացնում է իմ ժողովուրդը, իմ ազգը, այն մարդիկ, որոնք ինձ դրսում տեսնելով՝ մոտենում, լավ բաներ են ասում», – ասաց «Ճերմակ Արջը»:
Պատասխանելով հարցին, թե վարչապետի հայտարարած մինչեւ 2050 թվականը 25 ոսկե մեդալ ունենալու համար ինչ է պակասում, Արթուր Ալեքսանյանը ասաց. «Պակասելու բան չկա: Կառավարության, մեր նախարարության կողմից ուշադրությունը զգում ենք: Մնում է աշխատել: Մարզիկները իրենց առջեւ պետք է նպատակ դնեն ու ձգտեն դրանց հասնել»:
Արթուր Ալեքսանյանը դժվարացավ ասել, թե օլիմպիական երկրորդ ոսկուց հետո որքան կշարունակի մարզիկի կարիերան: «2050 թվականին դժվար թե ես կարողանամ օլիմպիական խաղերին մասնակցել ու մեդալի արժանանալ, բայց եթե 25 ոսկիներից մի քանիսը կարողանամ նվաճել, շատ լավ կլինի»,-ասաց նա:
Հարցին, թե կարդացե՞լ Արսեն Ջուլֆալակյանի ֆեյսբուքյան գրառումը հավաքականում մարզիչների կայացրած որոշումների մասին, Արթուրը պատասխանեց. «Ես մարզիչների որոշումները չեմ քննարկում: Ես մարզիչների որոշումները կատարում եմ: Իսկ թե ով ինչ գրառում է կատարել, ոչինչ ասել չեմ կարող»:
Կարդացեք նաև
Աշոտ ՀԱԿՈԲՅԱՆ
