«Առանձին գերատեսչություններ, ունենալով իրենց նպատակահարմար տնտեսվարողներ, նախնական պայմանավորվածություն էին ձեռք բերում տնտեսվարողի հետ եւ ասում, որ նշված բոլոր չափանիշներին համապատասխան ապրանք ներկրեն: Մրցույթն էլ կազմակերպում էին հենց այդ ապրանքների չափանիշներով: Այսինքն, ակնհայտ անհավասար պայմաններ էին ստեղծվում մյուս տնտեսվարողների համար և ստեղծվում այնպիսի իրավիճակ, որ գերիշխող դիրք գրավողները դառնում են մոնոպոլներ»,-այսօր խորհրդարանում լրագրողների հետ զրույցում ասաց ԲՀԿ խմբակցության պատգամավոր Սերգեյ Բագրատյանը`պնդելով, որ «Պետական գնումների մասին» ՀՀ օրենքն ամբողջովին պետք է փոխվի, քանի որ տարիներ շարունակ, այդ գործընթացում տեղի են ունեցել եւ տեղի են ունենում բազմաթիվ խախտումներ, ինչի դեմ երկար ժամանակ հնարավոր չէր պայքարել:
Հիշեցնենք, այսօր ԱԺ ֆինանսավարկային եւ բյուջետային հարցերի մշտական հանձնաժողովը խորհրդարանական լսումներ էր կազմակերպել`«Պետական գնումների համակարգի հիմնախնդիրները եւ դրանց լուծման ուղիները» թեմայով:
Ըստ պատգամավորի, եթե այսօր Հայաստանը պատրաստվում է իրականացնել տնտեսական հեղափոխություն, ապա առաջին հերթին պետք է ապահովի ազատ մրցակցային պայմաններ՝ հարկային և մաքսային օրենսդրական փոփոխությունների հետ միասին: Թե ինչո՞ւ է հապաղում տնտեսական հեղափոխություն հայտարարած իշխող ուժը, ինչո՞ւ հնարավոր չէր նախորդ երկու տարիների ընթացքում այդ ամենն անել`Aravot.am-ի հարցերին ի պատասխան, ԲՀԿ-ական պատգամավորն ասաց` չգիտի. «Ես արդեն նշեցի մեկ անձից գնումներ կատարելու բազմաթիվ օրինակներ, որոնք շարունակվում են նաեւ այսօր, այս պատճառով օրենսդրությունն ամբողջովին պետք է փոխվի՝ կոռուպցիոն ռիսկերից խուսափելու համար: Այս արատավոր պրակտիկան պետք է վերացնենք, լղոզված ձեւակերպումը, մեկ անձից գնում կատարելը, պետք է վերացնել»:
Կարդացեք նաև
Այլ մանրամասները`տեսանյութում
Նելլի ԳՐԻԳՈՐՅԱՆ
