ԱՄՆ նախագահ Դոնալդ Թրամփի վարչակազմի կողմից Բաքվին 100 միլիոն դոլարի անվտանգության և ռազմական օգնության փաթեթը հիմնականում ուղղված է Իրանի դեմ ադրբեջանա-ամերիկյան համատեղ ծրագրերի ֆինանսավորմանը, միևնույն ժամանակ հարձակողական նոր հնարավորություններ է ընձեռում Արցախի և Հայաստանի դեմ շարունակական ագրեսիա իրականացնող Ալիևի ռեժիմի համար: Այս մասին ասվում է ԱՄՆ Հայ դատի հանձնախմբի (ANCA) հայտարարության մեջ:
«Մենք անհանգստացած ենք, որ Թրամփի վարչակազմի 100 միլիոն դոլարի օգնության փաթեթի միջոցով Ադրբեջանը համալրում է իր զինանոցը՝ մարտավարական, հարձակողական հնարավորություն ունեցող զինատեսակներով…Ամերիկացի հարկատուներին չպետք է խնդրեն թեկուզ մեկ դոլար հատկացնել Ալիևի ագրեսիվ ռեժիմին ռազմական օգնություն ցուցաբերելու համար, որը դեռ մեկ շաբաթ առաջ Գերմանիայի Մյունխեն քաղաքում կրկին սպառնաց հարձակվել Արցախի վրա և հրապարակայնորեն ստեց՝ Երևանը և ամբողջ Հայաստանը ներկայացնելով որպես Ադրբեջանի տարածք: Թրամփի վարչակազմը պետք է կամ դադարեցնի ռազմական օգնության տրամադրումը Բաքվին կամ պետք է ամեն մի դոլարը համադրի Հայաստանին տրամադրվող օգնության հետ»,-հայտարարել է ANCA-ի ներկայացուցիչ Թերեզա Երիմյանը:
ANCA-ն նաև գրավոր դիմում է ներկայացրել Կոնգրեսի հատկացումների հանձնաժողովին՝ կոչ անելով հրաժարվել Ադրբեջանին միջոցներ հատկացնելուց:
Պատրաստեց՝ Վիկտորյա ԱՆԴՐԵԱՍՅԱՆԸ
