2019թ. հոկտեմբերին վրացական սերվերների և ինտերնետային էջերի վրա կատարված զանգվածային կիբերհարձակումն իրականացրել է Ռուսաստանի Զինված ուժերի գլխավոր շտաբը: Ինչպես հաղորդում են վրացական լրատվամիջոցները, այս մասին հայտարարել է Վրաստանի ԱԳՆ-ի ներկայացուցիչ Վլադիմիր Կոնստանտինիդին:
Տեղեկատվության համաձայն՝ տվյալ կիբերհարձակման նպատակն էր վնաս հասցնել Վրաստանի ազգային անվտանգությանը, երկրի բնակչությանը՝ խափանելով պետական, ինչպես նաև մի շարք այլ կազմակերպությունների սերվերները: Քննության, որն իրականացրել է վրացական կողմը և ստացված տեղեկատվության համաձայն, որը ձեռք է բերվել միջազգային գործընկերների հետ համագործակցության միջոցով, կիբերհարձակումը ծրագրավորվել և իրականացվել է ՌԴ Զինված ուժերի գլխավոր շտաբի կողմից:
Հիշեցնենք, որ Վրաստանում զանգվածային կիբերհարձակումն իրականացվել էր 2019թ. հոկտեմբերի 28-ին, թիրախում գտնվել են նախագահի, իշխանության տարբեր ճյուղերի ու ընկերությունների, այդ թվում՝ «Իմեդի» և «Մաեստրո» հեռուստաընկերությունների կայքերը Հարձակումից հետո այդ էջերում բացվում էր Վրաստանի նախկին նախագահ Միխեիլ Սաակաշվիլիի նկարը՝ «Ես կվերադառնամ» գրառմամբ:
Պատրաստեց՝ Վիկտորյա ԱՆԴՐԵԱՍՅԱՆԸ
