Բոննի Կոնվերսիայի միջազգային կենտրոնը հրապարակել է 2019թ. աշխարհի ամենառազմականացված երկրների ինդեքսը, որում Հայաստանը զբաղեցրել է երրորդ հորիզոնականը: Աղյուսակի առաջին հորիզոնականում Իսրայելն է, որին հետևում է Սինգապուրը, Հայաստանը,Կիպրոսը, Հարավային Կորեան, Ռուսաստանը, Հունաստանը, Հորդանանը, Բելառուսն ու Ադրբեջանը։
Աղյուսակում ընդգրկված է 154 երկիր, որոնք դասակարգված են մի քանի չափանիշներով՝ ռազմական ոլորտի ծախսեր, զինված ուժերի, սպառազինության և բնակչության, ՀՆԱ-ի հարաբերակցություն, տնտեսական զարգացման ընդհանուր մակարդակ, պետական կառավարում և այլն: Առաջին տասնյակում հայտնված երկրներում ռազմական ոլորտի ծախսերը խստորեն կանոնակարգված են և կարևորվում են՝ ի տարբերություն այլ ոլորտների:
Զեկույցի համաձայն՝ Հարավային Կովկասում ռազմականացվածության աստիճանը շարունակում է շատ բարձր մնալ, որի պատճառը արցախյան չկարգավորված հակամարտությունն է: Ռուսաստանը շարունակում է մնալ ունենալ աշխարհում ամենամեծ ռազմական ներուժը և վերջին տարիներին արդիականացրել է ռազմական տեխնիկան: Եվրոպայում ՆԱՏՕ-ի անդամ երկրները սկսել են մասշտաբային երկարաժամկետ սպառազինության ծրագրեր իրականացնել, ինչը ինդեքսի հեղինակները կապում են առաջին հերթին Ռուսաստանի հետ լարված հարաբերություններով և ուկրաինական հակամարտությամբ:
Հայաստանի մյուս հարևաններից Թուրքիան՝ 19-րդ տեղում է, Վրաստանը՝ 49-րդ, իսկ Իրանը՝ 24-րդ:
Կարդացեք նաև
Նշենք, որ 2018թ. Հայաստանը կրկին զբաղեցրել էր երրորդ հորիզոնականը:
Պատրաստեց՝ Վիկտորյա ԱՆԴՐԵԱՍՅԱՆԸ
