«Այս հանրաքվեն կարող է էական լինել՝ անկախ ՍԴ ունենալու համատեքստում: Այն կարող է հետաքրքրական լինել, եթե դրա արդյունքում ձեւավորվելու է անկախ ՍԴ: Մեզ համար ակնհայտ է, որ գործող ՍԴ-ն իր կազմով չունի բավարար վստահություն՝ ՀՀ-ում սահմանադրական արդարադատություն իրականացնելու համար»,-«Հայացք» մամուլի ակումբում լրագրողների հետ հանդիպմանն այսօր անդրադառնալով ապրիլի հինգին Սահմանադրական դատարանի նախագահ Հրայր Թովմասյանի եւ ՍԴ «հին կազմի» դատավորների պաշտոնավարման հարցով կայանալիք հանրաքվեին՝ ասաց «Քաղաքացու որոշում» կուսակցության մամուլի խոսնակ Միքայել Նահապետյանը:
Նրա բնորոշմամբ՝ սահմանադրական վերահսկողության այն շրջանակը, որը վերապահված է ՍԴ-ին, առնչվում է ՀՀ-ի ամենասուր եւ ցավոտ հարցերին, այդ թվում՝ ընտրական գործընթացին. «ՍԴ-ն ոչ միայն չի վաստակել, այլեւ մսխել է վստահության հնարավորությունը: «Ոչ»-ը չի նպաստի անկախ ՍԴ ունենալուն, իսկ «այո»-ի դեպքում հարցի շուրջ կարծիք հայտնելու հնարավորություն կա քարոզարշավի ընթացքում: Փոխելով ՍԴ գործող կազմը՝ արդյոք համաձա՞յն ենք այն լայն լիազորությունների հետ, որն ունի ՍԴ-ն»:
Նահապետյանի խոսքով՝ հանրաքվեն ուղիղ ժողովրդավարության տեսանկյունից հարցեր լուծելու լավագույն մեխանիզմն է. «Եթե նպատակն է լավ ՍԴ ունենալը, իմաստ չի լինի չմասնակցելը»:
Ըստ Նահապետյանի՝ իշխանությունը մեծ քայլ կանի, եթե նախապես հրապարակի այն մարդկանց ցանկը, որոնք երկու ամիս անց առաջադրվելու են ՍԴ նախագահի պաշտոնում. «Կա՞ պատկերացում, թե ովքեր են լինելու ՍԴ նոր դատավորների թեկնածուներ: Եթե անուններ կան, դրանք պետք է հրապարակվեն: Դատավորի կերպարը նախ հանրային ստուգման պետք է ենթարկվի: Մինչեւ հանրաքվեն անունների հրապարակումը ցույց կտա, որ նոր ՍԴ-ն չի համապատասխանելու քաղաքական թիմի ցանկությանը»:
Կարդացեք նաև
Լուիզա ՍՈՒՔԻԱՍՅԱՆ
