Ադրբեջանի նախագահ Իլհամ Ալիեւը Մյունխենյան բանավեճին եկել էր առանց օրակարգի: Սա «Օրբելի» կենտրոնի փորձագետ, ադրբեջանագետ Տարոն Հովհաննիսյանի տպավորությունն է Մյունխենում կայացած Նիկոլ Փաշինյան-Իլհամ Ալիեւ բանավեճից: «Եկել էր շոուի համար, ինչը խոսում է այն մասին, որ Ադրբեջանը պատրաստ չէ խնդրի կարգավորմանը»,- այսօր «Բլից ինֆո» մամուլի ակումբում հայտարարեց փորձագետը:
«Իլհամ Ալիեւի պահվածքը, օրակարգի բացակայությունը, միջազգային իրավունքի կարեւորգույն նորմի` ինքնորոշման նորմի մասին քամահրանքով խոսելը եւ այլն, ցույց տվեցին, որ ինքն իսկապես այդպես է մտածում: Այնքան են այդ քարոզչությունը վարել, որ ինքն էլ համոզված է՝ այդպես պետք է լինի: Նա հայտարարում է, որ եթե հայերը ցանկանում են երկրորդ անգամ ինքնորոշվել, թող գնան այլ տեղ փնտրեն: Իրականում, այնպես չէ, որ իրենց պետք է Արցախն առանց հայերի, իրենց պետք է տարածաշրջանն առանց հայերի: Սա իրենց քաղաքականությունն է, որն ասվում է Իլհամ Ալիևի մակարդակով: Սա նշանակում է, որ նա պատրաստ չէ և չի ցանկանում հակամարտության կարգավորում»,- ասաց Տարոն Հովհաննիսյանը:
Անդրադառնալով Նիկոլ Փաշինյանի խոսքին, փորձագետը նկատեց, որ խնդիր կա «տարածք» տերմինը ԼՂ հակամարտության բանավեճից հանելու, քանի որ այդ կոնֆլիկտը տարածքային չէ, այլ գոյություն ունենալ- չունենալու:
Մյունխենյան հանդիպման ժամանակ վարչապետ Նիկոլ Փաշինյանը հայտարարեց`«Արցախը Հայաստանի համար զուտ տարածք չէ, այլ՝ անվտանգություն»: Փորձագետն այդ ձեւակերպումը համարում է «բավականին հաջող», բայց այդ ձեւակերպման տրամաբանությունն ասում է, նոր չէ. «Դրանք անվտանգության գոտիներ են, անվտանգության շրջաններ, տարբեր ժամանակահատվածներում տարբեր մեկնաբանություն են ստացել»: Փոխզիջումը այս տիպի Ադրբեջանի հետ, ըստ փորձագետի, կնշանակի վտանգի տակ դնել Արցախի եւ Հայաստանի եւ բնակչության անվտանգությունը:
Կարդացեք նաև
Մյունխենյան հանդիպումներն, ըստ փորձագետի, շատ կարեւոր էին ի ցույց դնելու Ադրբեջանի դեստրուկտիվ պահվածքը, ինչը չարվեց։
Նելլի ԳՐԻԳՈՐՅԱՆ
