Հայաստանն առաջին անգամ առանձին տաղավարով կներկայացվի Բեռլինի միջազգային կինոփառատոնի շրջանակում գործող Եվրոպական ֆիլմերի կինոշուկայում: Վերջինս անցկացվում է փետրվարի 20-27-ը: Այս մասին ասուլիսում հայտնեցին Հայաստանի ազգային կինոկենտրոնի տնօրեն Շուշանիկ Միրզախանյանը և գեղարվեստական ղեկավար Մելիք Կարապետյանը:
«Դեռ 2019թ, երբ ես այցելեցի Բեռլինի կինոշուկա, ականատես եղա մի փաստի, որ Հայաստանից բազմաթիվ կինոգործիչներ էին ներկա եւ հարթակ չունեին, որտեղ կարողանան իրենց ժամադրություններն ու հանդիպումները կազմակերպել, լիարժեք աշխատանքը կատարել: Այդ պահից սկսած՝ նպատակ դրեցի անպայման 2020թ ունենանք այդ հնարավորությունը»,-ասաց տիկին Միրզախանյանը երախտագիտություն հայտնելով ԿԳՄՍ նախարարին ու փոխնախարար Արա Խզմալյանին: Նա նաեւ հայտնեց, որ կինոկենտրոնն արդեն նոր լոգո ունի եւ Բեռլինի տաղավարում կներկայանա նոր լոգոյով:
Հայաստանի ազգային կինոկենտրոնի տնօրենը հավելեց, որ պատվիրակությունը փոքր է եւ դրա կազմում է նաեւ փոխնախարար Արա Խզմալյանը, որի հետ կայցելեն շուկա: Հայաստանի ազգային կինոկենտրոնը հրավեր ունի նաեւ Պոտսդամի կինոինստիտուտի պրոֆեսոր Մարտին Հագեմանից: «Պարոն Խզմալյանի հետ պետք է այնտեղ էլ այցելենք եւ ծանոթանանք իրենց կրթական ծրագրերին, գործունեությանը ու համագործակցության եզրեր գտնենք կինոկրթության մասով»,-հավելեց նա
Տաղավարի պատասխանատու Մելիք Կարապետյանը նշեց, որ ուրախ է, որ վերջապես Հայաստանն իր տաղավարը կունենա: Ասաց, որ եվրոպական կինոշուկան նոր նախագծերի շուկա է, որտեղ պրոֆեսիոնալները հանդիպում են, գնում, վաճառում: Նա սահիկաշարով ներկայացրեց, թե ինչ է իրենից ներկայացնում Եվրոպական ֆիլմերի կինոշուկան: Ասաց, որ կներկայացվեն 2019-20 թթ արտադրված կամ արտադրության վերջին փուլում գտնվող ֆիլմերը եւ կինոժառանգությունը: Ներկայացրեց նաեւ կատալոգը, որտեղ ներկայացված են կինոկենտրոնից ֆինանսավորում ստացած ֆիլմերը, նաեւ նրանք, որոնք պետական ֆինանսավորում չեն ստացել, բայց ներկա են լինելու կինոշուկայում: 50 ֆիլմերի թվում են «Չնչիկը», «Ջիվանին», «Երազողները», «Զուլալին», «Դրախտի դարպասները» եւ այլն:
Կարդացեք նաև
Մանրամասն՝ տեսանյութում
Անդրադարձ եղավ նաեւ Վաշինգտոնում կայանալիք բազմաշերտ մշակութային միջոցառմանը, որտեղ մեկ առանձին բաժին նվիրվելու է հայկական կինոյին։ Նշվեց, որ Վաշինգտոնում ցուցադրվելու են Համո Բեկնազարյանի «Զանգեզուր», Սերգեյ Փարաջանովի «Նռան գույնը» եւ «Հակոբ Հովնաթանյան» ֆիլմերը։ «Վաշինգթոնի ազգային պատկերասրահը համագործակցելով ԱՄՆ-ում ՀՀ դեսպանության եւ Հայաստանի ազգային կինոկենտրոնի հետ կազմակերպել է «Հայկական ոդիսական» խորագրով փառատոն ,որը վերաբերում է հայ մշակույթին, երաժշտությանը եւ կինոյին… Հայկական կինոժառանգություն ենք ներկայացնելու ամերիկյան հանդիսատեսին»,-մանրամասնեց տիկին Միրզախանյանը:
Aravot.am-ը հետաքրքրվեց, թե ինչու է «Զանգեզուր» ֆիլմը ընտրվել, որտեղ Գարեգին Նժդեհը բացասական լույսի ներքո է ներկայացված: Մելիք Կարապետյանը պատասխանեց, որ ընտրությունը ամերիկյան կողմն է կատարել, այն կապել են Արամ Խաչատրյանի երաժշտության հետ, քանի որ ֆիլմի երաժշտությունը նրանն է:
Գոհար ՀԱԿՈԲՅԱՆ
