Երևան քաղաքի Աջափնյակ վարչական շրջանի նախկին ղեկավար Գևորգ Բաբայանի գործունեության առնչությամբ ՀՀ ոստիկանության Մաշտոցի բաժնում նյութեր են նախապատրաստվում։ Այս մասին «Փաստինֆո»-ին հայտնեցին Ոստիկանության լրատվական ծառայությունից։
«Երևանի քաղաքապետարանից գրություն է ստացվել, ոստիկանության Մաշտոցի բաժնում նյութեր են նախապատրաստվում»,- նշեցին Ոստիկանությունից։
Հարցին ի պատասխան, թե ի՞նչ խախտումների վերաբերյալ է գրություն ստացվել, Ոստիկանությունից ասացին, որ այլ մանրամասներ հրապարակման ենթակա չեն։
Հիշեցնենք, որ Գեւորգ Բաբայանը Երևանի Աջափնյակ վարչական շրջանի ղեկավար է նշանակվել հեղափոխությունից հետո՝ 2018 թվականի հոկտեմբերին՝ Երեւանի քաղաքապետ Հայկ Մարության կողմից, իսկ այս տարվա փետրվարի 18-ին նա հայտարարեց աշխատանքից ազատվելու դիմում ներկայացնելու մասին։
Կարդացեք նաև
Լրատվամիջոցներից մեկում հայտնվել էր հրապարակում, որում նշված էր, որ Բաբայանը Աջափնյակ համայնքի ճանաչված բնակիչներից մեկին՝ «Կարգին շինանյութի» կամ «Ջերմուկի Նորո» անուններով հայտնի գործարարի հարազատներին 17-րդ թաղամասում երեք առանձնատուն կառուցելու հնարավորություն է տվել՝ առանց թույլտվության։
Հեղինակ՝ Իզաբել Սահակյան
