Լրագրողների հետ ճեպազրույցի ժամանակ ՍԴ դատավոր Ֆելիքս Թոխյանը հորդորեց իրենց մեղադրել այնպիսի բաներում, որ իրականությանը համապատասխանում են: Aravot.am-ը հարցրեց՝ այդ հարցում մեզ կօգնե՞ք, ի՞նչ օրինակ կհուշեք: «Մեզ կարելի է մեղադրել, որ մենք արած գործը ժողովրդին լավ չենք ցույց տվել: Սա ընդունում եմ: Մենք, օրինակ, լրատվամիջոցներին փրկել ենք սնանկացումից: Այդ որոշման նախագծի վրա ես էլ եմ աշխատել, երբ համապատասխան օրենսդրությամբ շատ բարձր տուգանքներ ու վճարներ կար: Այդ հարցը մենք լուծեցինք: Հիմա էլի վճարում եք, բայց մի 10 անգամ քիչ: Ոչ մեկդ չի ասում, որ դա արել է Սահմանադրական դատարանը:
Մենք շատ կարեւոր հարց ենք լուծել՝ կապված Հյուսիսային պողոտայի հարցում սեփականության իրավունքի հետ: Որոշ մարդիկ այդ Հյուսիսային պողոտայի հաղթանակների հաշվին մինչեւ հիմա ապրում են: Մի անգամ չասացին, որ Եվրոդատարանում Հյուսիսային պողոտայի հարցը հաղթել են, որովհետեւ Սահմանադրական դատարանը այսպիսի որոշում է կայացրել: Եվրոդատարանում մեր որոշումը թափ է տալիս՝ հաղթում է, գալիս այստեղ մեզ փնովում է: Չի կարելի:
Ընդունեք նաեւ, որ լավ բաներ էլ ենք արել: Ես հպարտ եմ, որ այն դատավորներից եմ, որի նկարով մարդիկ կենսաթոշակի վերաբերյալ միտինգ են արել: Հիմա Թոխյանի հարցն եք դրել: Լավ եք անում: Բայց թացը չորից տարբերեք: Բարոյական նորմերը միշտ ավելի բարձր են եղել, քան իրավականը»,-պատասխանեց ՍԴ հնաբնակ դատավորը:
Աշոտ ՀԱԿՈԲՅԱՆ
