Ներկայացված տեսանյութը «Դինգո թիմ» կենդանիների իրավունքների պաշտպանության հ/կ-ին տրամադրել է այն բնակիչը, ում տան անվտանգության տեսախցիկը փետրվարի 11-ին արձանագրել է միջադեպը: Տեսանյութում ավտոմեքենան վրաերթի է ենթարկում չափերով խոշոր, պառկած մի շան:
Aravot.am-ի «ԿԵՆԴԱՆԱՊԱՏՈՒՄ» նախագծի հետ զրույցում «Դինգո թիմ»-ի կամավոր, Աջափնյակ վարչական շրջանի բնակիչ Վերա Կարապետյանը հայտնեց, որ դեպքը տեղի է ունեցել թիվ 100 դպրոցի եւ թիվ 42 մանկապարտեզի միջնահատվածում. «Մինչեւ շան վրաերթը փողոցն անցնում է տատիկ՝ փոքր երեխայի հետ, իսկ այդ ընթացքում շունը հանգիստ պառկած էր, չկար որեւէ հարձակում կամ այլ ռեակցիա… Այդ մեքենայով ծնողը երեխային տանում էր մանկապարտեզ: Ուղղությունն այնպիսին էր, որ այդ ճանապարհով այդ ժամին մեքենան այլ գնալու տեղ չուներ: Մեքենայի վարորդի ինքնությունը դեռ պարզ չէ, բայց մեր հարցուփորձը շարունակում ենք»:
https://www.facebook.com/vera.karapetyan/videos/2646649588717013/?epa=SEARCH_BOX
Վերա Կարապետյանը նշեց, որ կամավորի օգնությամբ շանը դեռեւս ողջ վիճակում (տեսանյութը՝ ստորեւ) հասցրել են կլինիկա, սակայն կենդանին քնեցվել է. «Ողնաշարի կոտրվածք էր ստացել, եւ անգամ վիրահատությունը չէր փրկի նրան…Սոցցանցով իմ եւ մանկապարտեզի էջի (երեխաս էլ է այդ մանկապարտեզ հաճախում) միջեւ զրույց եղավ: Պատասխանողն ասաց, որ իրենց տեղեկություններով՝ շունը հարձակվել է մեքենայի վրա ու վթարի ենթարկվել, պատկերացնո՞ւմ եք…իրենց այդպես են ասել, պարզ է, որ ինչ-որ մեկն արդարացել է: Բայց երբ ցույց տվեցի տեսանյութը, իրենք էլ էին շոկի մեջ, հազար անգամ ներողություն խնդրեցին»:
Կարդացեք նաև
https://www.facebook.com/vera.karapetyan/videos/2647004118681560/
Վերա Կարապետյանի խոսքով՝ շունը, որի կյանքը փրկել չհաջողվեց, խելոք եւ հանգիստ է վարք է ունեցել, եւ այդ մասին է փաստել բնակիչը, որի առանձնատան տեսախցիկն արձանագրել է կատարվածը. «Երբեւէ որեւէ մեկին այդ շունը չի վնասել, նրան այդ տարածքում մշտապես սիրել ու կերակրել են»:
Հիշեցնենք, որ կենդանու հանդեպ դաժան վերաբերմունքը ՀՀ-ում արդեն քրեորեն պատժելի արարք է: «Դինգո թիմ»-ը դիմել է Ոստիկանություն:
Լուիզա ՍՈՒՔԻԱՍՅԱՆ
«ԿԵՆԴԱՆԱՊԱՏՈՒՄ»-ին դիմելու հեռախոսահամար +37495 85 99 06
Լուսանկարները եւ տեսանյութը՝ Վերա Կարապետյանի
