«Ոսկե կաթը» Հնդկաստանից եկած ավանդական ըմպելիք է, որի հիմքում քրքումն է՝ վառ դեղին գունավորում ունեցող համեմունքը, որն այնքան սիրված է Արևելքում։ Քրքումն օժտված է հակաբակտերիալ և հակաօքսիդանտային հզոր ազդեցությամբ, կաթն էլ իր հերթին առանձնանում է իր օգտակար հատկություններով և այս երկու բաղադրամասերի ներմուծումն ամենօրյա սննդակարգ օգնում է հոգ տանել սեփական առողջության մասին և կանխարգելել մի շարք հիվանդությունների և վարակների առաջացման հավանականությունը։
Ինչո՞ւ արժե «ոսկե կաթ» օգտագործել
«Ոսկե կաթ»՝ այսպես է կոչվում քրքումով ըմպելիքը, որը շատ օգտակար է ողջ ընտանիքի համար։ Այն առողջության էլիքսիր է համարվում, որն օգնում է նվազեցնել օրգանիզմում բորբոքային պրոցեսներն ու ամրապնդել իմունային համակարգը, նպաստում է սրտի և անոթների առողջության կարգավորմանն ու օգնում պայքարել ավելորդ քաշի դեմ։ Քրքումով ըմպելիքը նաև կարգավորում է արյան մեջ շաքարի մակարդակը։
Ի՞նչ օգտակար հատկություններով է առանձնանում քրքումով կաթը
Ամրապնդում է օրգանիզմի իմունային պաշտպանությունը
Կարդացեք նաև
Քրքումով կաթն օգնում է ամրապնդել իմունային համակարգը։ Քրքումը հակամիկրոբային ազդեցություն ունի և օգնում է պայքարել մանրէների ու վիրուսային վարակների դեմ։
Մարսողության խանգարումերի դեմ պայքարող միջոց է
Քրքումը կարգավորում է մարսողությունը, վերացնում փորափքանքը, ստամոքս-կերակրափողային հետհոսքի (ռեֆլյուքս) հետևանքով առաջացած այրոցը։ Համեմունքի կազմում առկա քրքումին նյութը խթանում է լեղու արտադրությունը, որն անհրաժեշտ է ճարպերի ճեղքման համար, կանխարգելում է ստամոքսաղիքային ախտածին գործընթացները, օգնում է պայքարել մակաբույծների դեմ։ Քրքումի օգտագործումը բարենպաստ է անդրադառնում աղիքային բորբոքումների բուժման վրա․ այս սննդանյութը նաև շատ օգտակար է ենթաստամոքսային գեղձի համար։ Քրքումով կաթը կարգավորում է մարսողությունն ու օգնում կանխարգելել խոցերի, փորլուծության առաջացումը։
Քրքումով կաթը մաքրում է արյունը
Քրքումը դետոքսիկացիայի հզոր միջոց է։ Քրքումն օգնում է դուրս բերել արյան կազմից թունավոր նյութերը, ինչպես նաև կարգավորում է լյարդի աշխատանքը։
Այս համեմունքը նաև օժտված է միզամուղ ազդեցությամբ, ինչը նույնպես թույլ է տալիս օրգանիզմից դուրս բերել թունավոր նյութերն ու շլակները։ Քրքումով կաթը նաև օգտակար է փայծաղի համար։
Օգնում է հարբուխի, հազի, կոկորդի ցավի դեպքում
Քրքումով կաթն օգնում է շնչառական հիվանդությունների ժամանակ՝ տաքացնելով մարմինն ու նպաստելով թոքերից ու շնչառական ուղիներից խորխի դուրսբերմանը։
Քրքումն օգտակար է ասթմայի ու բրոնխիտի դեպքում։ Քնից առաջ մեկ գավաթ «ոսկե կաթը» կօգնի թուլացնել հազն ու հանգիստ քուն մտնել։
Պայքարում է հոդերի հետ կապված խնդիրների դեմ
Քրքումը օգնության կհասնի, երբ առկա են հոդերի և հենաշարժողական ապարատի հետ կապված խնդիրներ։ Քրքումով կաթն օգտակար է արթրիտի, արթրոզի, բուրսիտի դեպքում, քանի որ պայքարում է բորբոքումների դեմ, պաշտպանում է ոսկորներն ու օգնում պահպանել հոդերի շարժունակությունը։
Քրքումով կաթն արդյունավետ է գլխուղեղի ու նյարդային համակարգի համար
«Ոսկե կաթը» խորհուրդ է տրվում խմել, եթե անհանգստացնում են գլխացավերը։ Արյունը ջրիկացնելու հատկության շնորհիվ քրքումն ակտիվացնում է արյան շրջանառությունը։ Համեմունքը դրական է անդրադառնում գլխուղեղի և նյարդային համակարգի աշխատանքի վրա։ Այն օգնում է պայքարել դեպրեսիայի, հոգեկան ապրումների դեմ, լավացնում է հիշողությունը, թույլ է տալիս թոթափել լարվածությունն ու բարկությունը։
Նպաստավոր է լյարդի ու լեղապարկի համար
Կատարվել են հատուկ հետազոտություններ, որոնք փաստում են, որ քրքումինն ունակ է դրական ազդել լյարդի ցիռոզի և ճարպային հիվանդության բուժման վրա։ Քրքումինը պաշտպանում է լյարդը ոգելից խմիչքների չարաշահման, ծանր մետաղների ազդեցության հետևանքով առաջացած թունավորումից։ Քրքումը կանոնավորում է լեղապարկի աշխատանքն ու օգնում կանխարգելել լեղապարկի քարերի առաջացումը։
Սակայն հարկավոր է իմանալ, որ լեղաքարային հիվանդություն ունեցող մարդկանց քրքումի օգտագործումը հակացուցված է։
Կարգավորում է նյութափոխանակությունը
Քրքումինը մասնակցում է նյութափոխանակության գործընթացների կարգավորմանը։ Դա դրսևորվում է ինսուլինի արտադրման ակտիվացմամբ։ Քրքումով կաթն իջեցնում է խոլեսթերինը, պայքարում է ճարպի դեմ՝ նպաստելով նիհարեցմանը։
Օգնում է կանխարգելել սիրտ-անոթային խնդիրները
«Ոսկի կաթի» ամենօրյա օգտագործումը նվազեցնում է սրտի հետ կապված խանգարումների առաջացման հավանականությունը։ Քրքումն օգնում է կանխարգելել թրոմբոզը, աթերոսկլերոզը, կարգավորում է զարկերակային ճնշումն ու սրտի ռիթմը։ Քրքումի բաղադրության մեջ առկա С և Р վիտամիններն ամրացնում են անոթները։ Քրքումինն օժանդակող միջոց կարող է լինել առիթմիայի, սրտի կաթվածի և սրտի այլ պաթոլոգիաների բուժման ժամանակ։
Հոգ է տանում վերարտադրողական առողջության համար
Քրքումն օգտակար է թե; կանանց, թե՛ տղամարդկանց վերարտադրողական առողջության պահպանման ու կարգավորման համար։ «Ոսկե կաթն» օգնության է գալիս դաշտանադադարի ժամանակ առաջացած գինեկոլոգիական մի շարք խնդիրների դեպքում։ Քրքումինն արգանդի յուրօրինակ խթանիչ է, որն օգնում է կարգավորել դաշտանային ցիկլը։
Մաշկային խնդիրները հարթող ազդեցություն ունի
Քրքումը վաղուց ի վեր գործածվում է կոսմետիկ միջոցների պատրաստման համար։ Այն մաշկը դարձնում է հարթ, օգնում է ազատվել կորյակներց, նպաստում է վերքերի արագ լավացմանը։
«Ոսկե կաթի» պարբերաբար օգտագործումը թեթևացնում է էկզեմա ունեցող մարդկանց վիճակը։
Օգնում է կանխարգելել չարորակ նորագոյացությունների առաջացումը
Քրքումով կաթն իր հակաբորբոքային ազդեցության շնորհիվ օգնում է կանխարգելել կրծքագեղձի, մաշկի, թոքերի, հաստ աղիքի ուռուցքային հիվանդությունների առաջացումը։ ԸՄպելիքը պաշտպանում է ԴՆԹ-ի բջիջներն ու նվազեցնում քիմիաթերապիայի հետևանքները։
Ինչպե՞ս պատրաստել «ոսկե կաթ»
Քրքումով կաթ պատրաստելու համար նախ պետք է քրքումով մածուկ պատրաստել, որը հետագայում ըմպելուց առաջ խառնվում է կաթի հետ։
Մածուկ պատրաստելու համար պետք է վերցնել 2 ճաշի գդալ քրքում և 1 բաժակ ջուր, խառնել բաղադրամասերն ու եփել մարմանդ կրակի վրա՝ անընդհատ խառնելով մոտ 7 րոպե՝ մինչև ստացվի թանձր մածուկ։
Այնուհետև մածուկը հովացնել, լցնել ապակյա տարայի մեջ ու պահել սառնարանում (մթերքը կարելի է այդպես պահել մինչև մեկ ամիս)։
«Ոսկե կաթ» պատրաստելու համար 1 բաժակ կաթը տաքացնել մինչև եռման աստիճանի, բայց չթողնել, որ եռա, և ավելացնել 1 թեյի գդալ քրքումի մածուկ։
Քրքումի ավելի լավ յուրացման համար կարելի է ըմպելիքի մեջ կես թեյի գդալ քունջութի, նուշի կամ կոկոսի յուղ ավելացնել։
Ըստ ցանկության ըմպելիքին կարելի է նաև մեղր ավելացնել, սակայն պետք է հիշել, որ մեղրը չի կարելի լցնել տաք կաթի մեջ, քանի որ մեղրը տաքանալով ոչ միայն կորցնում է իր վիտամիններն ու ֆերմենտները, այլև մեղրի մեջ քաղցկեղածին նյութ է սկսում ձևավորվել։
Ինչպե՞ս խմել քրքումով կաթը
Եթե դուք պլանավորում եք քրքումով կաթն ըմպել որպես բուժիչ միջոց, ապա խորհուրդ է տրվում այն ըմպել 30-40 օր՝ տարեկան 1-2 անգամ
Ավելի նպատակահարմար է սկսել փոքր չափաբաժիններով՝ սկզբից կաթին ավելացնելով մեկ քառորդ թեյի գդալ քրքումի մածուկ։ Եվ եթե չնկատվեն կողմնակի ազդեցություններ, ապա կարելի է մածուկի քանակը հասցնել մինչև 1 թեյի գդալի։
Քրքումով կաթն օրական ըմպում են 1 անգամ՝ տաք վիճակում՝ սնվելուց առաջ, կամ սնվելուց 2 ժամ հետո։
Քրքումով կաթ ըմպելուց առաջ նաև պետք է իմանալ
Քրքումի՝ նախատեսվածից ավելի շատ քանակով օգտագործումը կարող է ստամոքսի այրոց, խանգարում, փորլուծություն առաջացնել, դառնալ ներքին արյունահոսության պատճառ, հարուցել լեղապարկի հիպերակտիվ կծկումներ, խանգարել դաշտանային ցիկլը։
Հղի կանանց նույնպես խորհուրդ է տրվում խուսափել քրքումի շատ օգտագործումից, քանի որ այն խթանում է արգանդի պատերի կծկումները։
Քրքումն անհամատեղելի է մի շարք դեղամիջոցների հետ։ Մարդիկ, որոնք հակամակարդիչ (անտիկոագուլյանտ) պրեպարատներ են ընդունում, պետք է խուսափեն քրքում օգտագործելուց։
Քրքումը թեև բազմաթիվ հիվանդություններ ու խնդիրներ կանխարգելող բնական միջոց է, սակայն կարող է և բացասական ազդեցություն ունենալ առողջության վրա, եթե դրա օգտագործմանը ճիշտ մոտեցում չցուցաբերվի։ Ուստի խորհուրդ է տրվում քրքումով կաթն օգտագործելիս ուշադիր լինել չափաբաժինների նկատմամբ և հետևել օրգանիզմի ազդակներին։
Ծանուցում․նյութն ընդհանուր տեղեկատվական բնույթ է կրում և չի հետապնդում բուժում նշանակելու նպատակ։
Պատրաստեց Մարինե ԱԼԵՔՍԱՆՅԱՆԸ
