«Պետականության դեմ հանցագործություն է տեղի ունենում: Պատճառն այն է, որ իշխանությունը թույլ է տալիս հանցագործություն, շահարկում ժողովրդի անունը եւ հանրաքվեն բերում օրակարգ: Իրականում իշխանությանը պետք չի հանրաքվեն, այն պետք է միայն նրա համար, որ ժողովրդի անունից եւ ժողովրդի անունով քողարկի իր հանցագործությունը: Սա սահմանադրական կարգի տապալում է: Չի կարող իշխանությունը ոչնչացնել, յուրացնել դատական իշխանության իրավունքները»,-«Պոլիտէկոնոմիա» հետազոտական ինստիտուտի կազմակերպած՝ սահմանադրական անվտանգության թեմայով քննարկման ժամանակ այսօր անդրադառնալով ապրիլի 5-ին սպասվող՝ ՍԴ նախագահ Հրայր Թովմասյանի եւ ՍԴ «հին կազմի» դատավորների պաշտոնավարման հարցով հանրաքվեին՝ ասաց ՀՅԴ գերագույն մարմնի անդամ Արծվիկ Մինասյանը:
https://www.facebook.com/aravot.am/videos/193437768434245/
Նրա բնորոշմամբ՝ իշխանության շրջանում շահարկվում է միտքը, թե Հրայր Թովմասյանն ավելի բարձր է դասված, քան ժողովուրդը. «Սա մանիպուլյացիա է: Իշխանությունը եւ, ցավոք, դրսում կրթված մի շարք պատգամավորներ իրենց թույլ են տալիս ցածր մակարդակի վրա իջնել եւ ներկայացնել, թե ժողովրդի իրավունքը վերցրել-տվել են ՍԴ-ին: Սա աբսուրդ է, երբ ասում են, որ ժողովուրդը պետք է որոշում կայացնի, այլ ոչ թե ՍԴ-ն: Չի կարելի նման ցածրակարգ մոտեցումներով ժողովրդին վերաբերվել»:
Արծվիկ Մինասյանի խոսքով՝ սփյուռքահայերն ապշած են, որ մեր երկրի ղեկավարը կարող է, օրինակ, դատարաններ շրջափակելու կոչ անել. «Նրանք հասկանում են, որ երկրի ղեկավարի գործելաոճը հիմա տանում է պետականության կորստի: Ինչո՞ւ են ձգտում օր առաջ իրենց ուզած սահմանադրական դատարանը ստեղծել: Հիմնավորումը, թե ուզում են բարեփոխում անել, բայց խոչընդոտում են, ծիծաղելի է: Որեւէ բարեփոխում չկա, անգամ «վեթինգ»-ին պատրաստ չեն»: Արծվիկ Մինասյանը քաղաքացիներին կոչ արեց «ոչ» ասել հանրաքվեին:
Կարդացեք նաև
Լուիզա ՍՈՒՔԻԱՍՅԱՆ
