Սիրիայի Իդլիբ նահանգում իրավիճակը շարունակում է թեժանալ: Երկուշաբթի Ասադի բանակի հարվածների հետևանքով թուրք զինծառայողներ են զոհվել: Թուրքիայում ոչ միայն պահանջել են պատասխան հարվածներ, այլ նաև սկսել են խոսել Ռուսաստանի հետ հարաբերությունները վերանայելու հնարավորության մասին՝ գրում է BBC-ն:
Ինչ է տեղի ունենում
Սիրիական բանակը՝ նախագահ Բաշար Ասադի ղեկավարությամբ, իրանամետ խմբավորումների հետ ռազմական գործողություններ է իրականացնում Իդլիբում, ինչն առաջացրել է Թուրքիայի դժգոհությունը: Նախ և առաջ, Իդլիբը ռազմավարական առումով չափազանց կարևոր է Թուրքիայի համար: Անկարան այս շրջանը համարում է իր ազդեցության գոտի: 2017թ. Սոչիի համաձայնագրով՝ Իդլիբում պետք է ստեղծվեր ապառազմականացված գոտի՝ թուրքական ռազմական հենակետերով: Ավելի վաղ Իդլիբի մարտերի համար թուրք զինվորականներ են զոհվել: Եվ եթե հիմա Անկարան դուրս գա զբաղեցրած դիքերից, Էրդողանը կկորցնի հեղինակությունն իր հայրենիքում:
Երկրորդ ՝ Ասադի ուժերը հարվածում են ոչ միայն ծայրահեղական իսլամիստական խմբավորումներին, այլ նաև Ասադին ընդդիմադիր ուժերին, որոնց աջակցում է Թուրքիան: Վերջին օրերին Սիրիայում զոհվել է 14 թուրք զինվորական: Էրդողանը հայտարարել է, որ պատասխան հարված կհասցնի սիրիական ուժերին «ամենուր, որտեղ կարող է»: Բացի այդ Թուրքիայի նախագահը վերջնագիր է ներկայացրել. մինչև փետրվարի վերջ Ասադի ուժերը՝ Ռուսաստանի աջակցությամբ, պետք է դուրս բերեն իրենց ստորաբաժանումները Իդլիբից:
Կարդացեք նաև
Աղետի շեմին
Անկարային անհանգստացնում է ևս մեկ գործոն՝ փախստականների վիճակը: Էրդողանն արդեն իսկ Սիրիային և Ռուսաստանին մեղադրել է խաղաղ բնակիչներին սպանելու մեջ: Նրա խոսքով՝ Ասադի ուժերը Ռուսաստանի աջակցությամբ «Իդլիբի անմեղ և տանջված բնակիչներին ուղարկում են մեր սահման»: Այս ամենը կարող է մարդասիրական աղետի հանգեցնել սիրիա-թուրքական սահմանին: Բանը նրանում է, որ Իդլիբում մեծ թվով փախստականներ են կուտակվել: Հումանիտար կազմակերպությունների տվյալներով՝ նահանգում այժմ գտնվում է շուրջ 3.5 միլիոն քաղաքացի:
Կոնֆլիկտ կլինի՞
Սիրիական վարչակարգի հետ ցանկացած լայնամասշտաբ ռազմական բախման դեպքում առավելություն կունենա Թուրքիան՝ հավատացած է վերլուծաբան, սիրիական հակամարտության մասին գրքի հեղինակ Ջոզեֆ Դաէրը: Չնայած դրան՝ Թուրքիան, ըստ ամենայնի, ցանկանում է խուսափել լարվածությունից և չի ուզում սպառնալիքի տակ դնել Ռուսաստանի հետ հարաբերությունները: «Մոսկվան միակ խաղացողն է, որ կարող է ցանկացած պահի զսպել Դամասկոսին և կանգնեցնել Ասադի թշնամական ծրագրերի իրագործումը Թուրքիայի հանդեպ: Թուրքիան ցանկանում է նաև սերտ հարաբերությունները պահպանել Ռուսաստանի հետ Անկարայի միջազգային մեկուսացման պատճառով»,-նշել է պրոֆեսորը:
BBC-ի թուրքական ծառայության լրագրող Էչի Գոքսեդեֆն էլ կարծում է, որ Թուրքիայի և Ռուսաստանի ներկայիս հարաբերությունները այնքան են սրվել, որ կարելի է համեմատել 2015թ. իրադարձությունների հետ, երբ թուրք զինվորականները ռուսական կործանիչ խոցեցին: «Ելքը մեկն է՝ քաղաքական հարցերը լուծել բանակցությունների օգնությամբ, իսկ ռազմական խնդիրները՝ հիբրիդային պատերազմի միջոցով»,-ասել է լրագրողը:
Մի շարք կոշտ հայտարարություններ անելով Մոսկվայի հասցեին՝ նախագահ Էրդողանը, այնուամենայնիվ, նշել է, որ Թուրքիան և Ռուսաստանը պետք է ձգտեն տարաձայնությունները լուծել խաղաղ ճանապարհով:
Պատրաստեց՝ Վիկտորյա ԱՆԴՐԵԱՍՅԱՆԸ
