«Պայթում է Նիկոլ Փաշինյանի ամենակարողության միֆը՝ ՍԴ-ի պատերին հանդիպելիս: Նրա համար կարեւոր է գրոհել եւ գրավել ՍԴ-ն, որպեսզի ցույց տա, որ ուժեղ է, որ ցանկացած որոշում կարող է պարտադրել»,-«Պոլիտէկոնոմիա» հետազոտական ինստիտուտի կազմակերպած՝ սահմանադրական անվտանգության թեմայով քննարկման ժամանակ այսօր անդրադառնալով ապրիլի 5-ին սպասվող՝ ՍԴ նախագահ Հրայր Թովմասյանի եւ ՍԴ «հին կազմի» դատավորների պաշտոնավարման հարցով հանրաքվեին՝ ասաց «Պոլիտէկոնոմիա»-ի նախագահ, վերլուծաբան Անդրանիկ Թեւանյանը:
Նրա խոսքով. «Գործ ունենք իրավական խնդրի հետ: Մեկ անձի կամ մի խումբ անձանց կողմից իշխանության յուրացման եւ սահմանադրական կարգի տապալման փորձ եմ նկատում: Ցավալի է, որ այսպիսի իշխանությունն է իր ընդդիմախոսներին սահմանադրական կարգի տապալման մեղադրանք առաջադրում»:
Ըստ Անդրանիկ Թեւանյանի՝ ակնհայտ է, որ խնդիր է դրված մեկ անձի շուրջ բռնապետական ռեժիմ հաստատելու եւ իշխանության տարանջատման սկզբունքը վերացնելու. «Խնդիր է դրված նաեւ դատական համակարգը ենթարկեցնելու մեկ մարդու բռնապետությանը»:
Լուիզա ՍՈՒՔԻԱՍՅԱՆ
