«Վերջին երկու նիստերում, որոնցում քննարկվել են մոտ 30 գործեր, ներում շնորհվել է 2 դատապարտյալի: Ներում շնորհել ասելով՝ պետք չէ հասկանալ, որ նրանք պատժից ազատվել են: Նրանց պատժի ժամկետը կարող է կրճատվել մեկ կամ երկու տարով, եւ այդ եղանակով է իրականացվել ներում շնորհելը: Մյուս դեպքերում ներման խնդրագիրը մերժվել է»,-ԱԺ նիստում այսօր հայտարարեց Արդարադատության փոխնախարար Սրբուհի Գալյանը:
Նա տեղեկացրեց, որ դատապարտյալներին ներում է շնորհում ոչ թե հանձնաժողովը, այլ նախագահը, իսկ հանձնաժողովի աշխատանքը խորհրդատվական բնույթ ունի, դրա կազմը հաստատում է վարչապետը:
«Հանձնաժողովը եզրակացությունը ներկայացնում է վարչապետին, նա էլ՝ նախագահին, որպեսզի վերջինս որոշի՝ ներում շնորհո՞ւմ է դատապարտյալին: Հնարավոր է նաեւ ընթացակարգ, երբ բացառիկ դեպքերում հանձնաժողովի փուլը շրջանցվում է, եւ վարչապետը գործը միանգամից ներկայացնում է նախագահին»,-նշեց փոխնախարարը:
Հավելենք, որ ԱԺ-ում այսօր առաջին ընթերցմամբ քննարկվում է «Ներման մասին» ՀՀ օրենքում փոփոխությունների օրինագիծը, որով այդ թվում սահմանվում է՝ ցմահ ազատազրկման դատապարտված անձը 15 տարի պատիժը կրելուց հետո միայն կարող է ներման խնդրագիր ներկայացնել: Գործող իրավակարգավորմամբ՝ պատժի կրման ժամկետը 20 տարի է: «Մենք խնդիր ենք դրել առավել մարդասիրական վերաբերմունք դրսեւորել: Հնարավոր են բացառիկ հանգամանքներ, որոնց դեպքում կարող է ծագել ներման համար ավելի վաղ դիմելու անհրաժեշտություն»,-նշեց Սրբուհի Գալյանը:
Կարդացեք նաև
Լուիզա ՍՈՒՔԻԱՍՅԱՆ
