Այսօր կառավարության նիստին գործադիրը որոշում ընդունեց գումար հատկացնել այն կուսակցություններին եւ կուսակցությունների դաշինքներին, որոնք 2018 թվականի ԱԺ ընտրություններում 3 եւ ավելի տոկոս շեմը հաղթահարել են:
Ըստ այս որոշման, պետական բյուջեից տարվա կտրվածքով ընդհանուր 103 մլն 725 հազար դրամ կհատկացվի այդ կուսակցություններին։
Ըստ այդմ՝ ՀՀԿ-ին կհատկացվի 5 մլն 208 հազար դրամ, ԲՀԿ-ին՝ 9 մլն 150 հազար դրամ, «Իմ քայլը» դաշինքին՝ 78 մլն դրամ, ՀՅԴ-ին՝ 4 մլն 303 հազար դրամ, ԼՀԿ-ին՝ 7 մլն դրամ։
Նշենք, որ այս որոշումը բխում է «Կուսակցությունների մասին» օրենքից:
Կարդացեք նաև
Նիստը վարող փոխվարչապետ Տիգրան Ավինյանն ասաց՝ արդեն ընթանում են լայնաֆորմատ քննարկումներ «Կուսակցությունների մասին» օրենքի փոփոխությունների շուրջ, եւ այս օրենքով նաեւ վերանայվելու է կուսակցությունների ֆինանսավորման կարգը:
Ավինյանի խոսքերով՝ անցել են այն ժամանակները, երբ կուսակցական գործունեությունը որեւէ վատ կամ բացասական երեւույթների հետ էր կապվում. «Կարծում եմ՝ «Կուսակցությունների մասին» օրենքի փոփոխություններով մենք պետք է հնարավորինս խթանենք, որ երիտասարդները հնարավորություն ու շահագրգռվածություն ունենան՝ զբաղվելու կուսակցական ու քաղաքական գործունեությամբ։ Քաղաքական կայունության եւ մեր պետականության համար շատ կարեւոր է, որպեսզի Հայաստանի հանրապետությունում կուսակցությունները կայանան ու զարգանան»:
Նելլի ԲԱԲԱՅԱՆ
