«Հայկական ատոմային էլեկտրակայանն» այսօր տուգանվեց 10 միլիոն դրամով: Ատոմակայանի հարցը քննարկվեց Հանրային ծառայությունները կարգավորող հանձնաժողովի նիստում: Ըստ հանձնաժողովի որոշման, ՀԱԷԿ-ը խախտել է լիցենզիայի պայմանները, ինչի համար էլ տուգանվել է: Խախտումներն ի հայտ են եկել այն բանից հետո, երբ 2019 թվականին, հանձնաժողովի նախագահի՝ հոկտեմբերի 3-ի եւ հոկտեմբերի 7-ի հրամանների հիման վրա ստեղծված աշխատանքային խումբը մոնիթորինգ է արել՝ պարզելու ՀԱԷԿ-ում արտադրվող էլեկտրական էներգիայի՝ սեփական կարիքների համար օգտագործումը արդյոք համապատասխանո՞ւմ է հանձնաժողովի սահմանած կարգավորումներին:
Այսօր հանձնաժողովի նիստում հարցը ներկայացրեց ՀԾԿՀ-ի Ֆինանսատեխնիկական եւ դիմումների քննարկման վարչության պետ Հայկ Ղոսալմյանը: Ըստ նրա, ՀԱԷԿ տարածքում գործել են մի շարք ընկերություններ, որոնք սպառել են ատոմակայանի կողմից արտադրված էլեկտրական էներգիան՝ չհանդիսանալով «Հայաստանի էլեկտրական ցանցեր» ընկերության (ՀԷՑ) բաժանորդ: Ուստի, Հանձնաժողովը 10 միլիոն դրամի չափով տուգանեց «Հայկական ատոմային էլեկտրակայան» ընկերությանը՝ թիվ 0002 լիցենզիայի պայմանների 9-րդ կետի խախտման համար:
«Հաշվարկային կենտրոն» ընկերությանը 45-օրյա ժամկետում պետք է կատարի համապատասխան վերահաշվարկ, որպեսզի ՀԱԷԿ-ը եռամսյա ժամկետում վերականգնի ՀԷՑ-ին, արդյունքում նաեւ սպառողներին հասցրած վնասը:
Հանձնաժողովի նիստին ներկա Հայաստանի ատոմակայանի իրավաբանը որոշ բացատրություններ ներկայացրեց, սակայն տուգանված կողմն, ըստ էության, ընդունեց խախտումը:
Կարդացեք նաև
Հանձնաժողովի մեկ այլ որոշմամբ, սահմանվեց, որ բնակչության դեպքում մինչեւ 5 մետր գազատարների շինմոնտաժային աշխատանքները կիրականացվեն «Գազպրոմ Արմենիա» ընկերության միջոցներով: Մնացած դեպքերում սպառողների կողմից միացման համար անհրաժեշտ աշխատանքների համար վճարված գումարը յուրաքանչյուր ամիս կնվազեցվի բաժանորդին մատակարարված բնական գազի արժեքից՝ տվյալ ամսում սպառված բնական գազի արժեքի 5%-ի չափով:
Նախկին կարգավորումների համաձայն գազատարների շինմոնտաժային աշխատանքների իրականացման համար վճարում էր դիմողը:
Լուսինե ԲՈՒԴԱՂՅԱՆ
