«Փոքրիկ կանայք» ֆիլմը նկարահանված է Լուիզա Մեյ Օլկոտտի համանուն վեպի հիման վրա: Ֆիլմի ռեժիսորն է ամերիկացի դերասանուհի, սցենարիստ և ռեժիսոր Գրետա Գերվիգը, որն առավել հայտնի է դարձել «mumblecore» (անկախ ֆիլմերի ժանր է, որը ստեղծվում է քիչ ֆինանսավորման հիման վրա, և սովորաբար առօրյա կյանքի և անձնական հարաբերությունների մասին է) ժանրի ֆիլմերի շնորհիվ։
Պրեմիերան տեղի է ունեցել 2019 թվականի դեկտեմբերի 7-ին, Նյու Յորքի ժամանակակից արվեստի թանգարանում։ Հայաստանում պրեմիերան տեղի է ունեցել այս տարվա հունվարի 30-ին։ Մինչեւ փետրվարի 20-ը այն հնարավոր է դիտել։
Գլխավոր դերերում հանդես են գալիս Սիրշա Ռոնանը՝ Ջոզեֆինա (Ջո) Մարչի դերում, Էմմա Ուոթսընը՝ Մարգարետ Մարչի դերում, Ֆլորենս Պյուն՝ Էմմի Մարչի դերում, Էլայզա Սկապլենը՝ Էլիզաբեթ Մարչի դերում և այլք։
Ֆիլմը պատմում է իրարից տարբերվող չորս քույրերի մասին: Գործողությունները տեղի են ունենում ԱՄՆ-ում՝ Քաղաքացիական պատերազմի ժամանակ, սակայն, այն խնդիրները, որոնց բախվում են աղջիկները, միշտ էլ մնում են արդիական` առաջին սեր, դառը հիասթափություն, տագնապալի բաժանում և կյանքում իրենց եւ իրենց տեղի դժվարին որոնումներ:
Գլխավոր հերոսուհին՝ Ջո Մարչը, ուներ անձնական մեկ այլ պայքար, նա չէր ընդունում կնոջ սեռի շուրջ ստեղծված կաղապարները, և բոլորովին համաձայն չէր, որ կնոջ առաքելությունը կյանքում լավ կին և մայր լինելուց բացի՝ ոչինչ չպետք է և չի կարող լինել։ Այսօրվա հայկական իրականության հետ համեմատական անցկացնելու դեպքում կհամոզվենք, որ հիմնականում շատ բան չի փոխվել, և որ շատ և շատ կանայք դեռ շարունակում են պայքարել նման խնդիրների դեմ։ Ներկայիս սերունդը (մեծամասամբ տղամարդիկ) շարունակում են օրենքներ կառուցել կանանց շուրջ, և նրանց դնել անիմաստ կաղապարների ու կապանքների մեջ։ Կնոջ դերը չգրված կանոնների ու «չի կարելիների» պատճառով սահմանափակվում է, իսկ նման վերաբերմունքը շատ հաճախ ծնում է վատ հետևանքներ։
Ջոն այս կաղապարների դեմ փորձում էր ընդվզել ամուսնանալ չցանկանալով, մեջբերեմ ֆիլմից՝
«Ջո- Ես ցանկանում եմ ինքնուրույն հասնել կյանքում ամեն ինչին։
Տիկին Մարչ- Կյանքում դժվար է ինքնուրույն ինչ-որ բանի հասնել, մանավանդ կանանց, նրանց հարկավոր է հաջող ամուսնություն»։
Բայց ինչպես և կյանքում, այնպես էլ ֆիլմում կյանքն իր ծրագրերն ունի, որոնք շատ հաճախ չեն համընկնում մեր ծրագրերի հետ, իսկ մեզ մնում է միայն անդավաճան մնալ մեր երազանքներին ու ցանկություններին, և շարժվել միայն առաջ, ինչպես և վարվում էր Ջո Մարչը։
Էլինա ՂԱԶԱՐՅԱՆ
