Մեկ տարում բնակարանների գները բավականին բարձրացել են
Մեկ տարվա ընթացքում հանրապետությունում անշարժ գույքի շուկայում գների աճ է գրանցվել: Այդ մասին են վկայում վիճակագրական կոմիտեի հրապարակած ցուցանիշները:
Ամենաբարձր գնաճը տեղի է ունեցել մայրաքաղաքում, բնակարանների գներն ամենաշատը թանկացել են Կենտրոն համայնքում:
Բնակարանների 1 քմ մակերեսի շուկայական միջին արժեքը Կենտրոն համայնքում 2018 թվականի դեկտեմբերին եղել է 569 հազար դրամ, իսկ 2019-ի դեկտեմբերին՝ 655 հազար դրամ: Կենտրոնում, ըստ գոտիավորման, գները տարբեր են, բայց, կրկին, թանկացում է գրանցվել, 1-ին գոտում բազմաբնակարան շենքերի բնակարանի 1 քմ-ն 2018-ին եղել է 678 հազար դրամ, իսկ 2019-ի դեկտեմբերին՝ 772 հազար դրամ, թանկացել է մոտ 94 հազար դրամով:
Կարդացեք նաև
Կենտրոնից հետո Արաբկիր համայնքն է, այստեղ մեկ տարվա ընթացքում բնակարանների գները միջինում բարձրացել են 65 հազար դրամով. 2018-ի դեկտեմբերին այստեղ բնակարանի 1քմ-ն կազմել է միջինը 388 հազար դրամ, իսկ 2019-ի դեկտեմբերին՝ 453 հազար դրամ:
Ապա, 3-րդ հորիզոնականում Քանաքեռ-Զեյթուն համայնքն է, այստեղ մեկ տարում բնակարանի 1քմ-ի արժեքը բարձրացել է 46 հազար դրամով: Նոր-Նորքում 2018-ի դեկտեմբերին 1քմ-ի արժեքը կազմել է 250 հազար դրամ, իսկ 2019-ի դեկտեմբերին՝ 292 հազար 300 դրամ:
Ավան համայնքում 2018-ի դեկտեմբերին 1քմ-ի արժեքը կազմել է 260 հազար 500 դրամ, 2019-ի դեկտեմբերին՝ 295 հազար 100 դրամ, իսկ Էրեբունիում 2018-ի դեկտեմբերին 1քմ-ի արժեքը կազմել է 258 հազար 500 դրամ, 2019-ի դեկտեմբերին՝ 290 հազար դրամ, Շենգավիթում 2018-ի դեկտեմբերին՝ 254 հազար դրամ, 2019-ի դեկտեմբերին՝ 300 հազար դրամ, Դավթաշենում 2018-ի դեկտեմբերին՝ 300 հազար դրամ, 2019-ի դեկտեմբերին՝ 343 հազար դրամ, Աջափնյակում 2018-ի դեկտեմբերին՝ 264 հազար 500 դրամ, 2019-ի դեկտեմբերին՝ 315 հազար դրամ, Մալաթիա-Սեբաստիա համայնքում 2018-ի դեկտեմբերին 1քմ-ի արժեքը կազմել է 247 հազար դրամ, 2019-ի դեկտեմբերին՝ 292 հազար դրամ: Ամենաէժան բնակարանները Նուբարաշեն համայնքում են, այստեղ 1 քմ-ն մեկ տարում թանկացել է 15 հազար դրամով, 2018-ի դեկտեմբերին 1քմ-ի արժեքը կազմել է 173 հազար 200 դրամ, իսկ 2019-ի դեկտեմբերին՝188 հազար դրամ:
Սակայն երբ դիտարկում ենք ՎԿ-ի՝ բնակարանների առուվաճառքի գործարքների ցուցանիշները, ապա դրանք այնքան էլ շատ չեն. 2018- դեկտեմբերին բազմաբնակարան շենքում 1 458 բնակարանի առուվաճառքի գործարք է եղել, իսկ 2019-ի դեկտեմբերին՝ 1 711 գործարք, 2018-ի դեկտեմբերին բնակելի տան առուվաճառքի 621 գործարք է եղել, 2019-ի դեկտեմբերին՝ 776: Բայց սա մեկ ամսվա համեմատականն է: Տարվա կտրվածքով՝ ավելին է:
Անշարժ գույքի շուկայում այս թանկացումը մի շարք հանգամանքներով է պայմանավորված, իհարկե, տնտեսական ակտիվությունը կարեւոր գործոն է, սակայն բնակարաների ձեռքբերումը մեծամասամբ կապված է հիփոթեքային վարկով առաջնային շուկայում, այսինքն, նորակառույցներում բնակարան ձեռք բերելիս եկամտային հարկի վերադարձով:
Արդյոք բնակարանների պահանջարկն այնքան բարձր է, որ գների նման նշանակալի բարձրացում լինի, ընդ որում, պետք է նշել, որ վարձակալությամբ տրվող բնակարանների արժեքն էլ բավականին բարձրացել է:
«Ռեդ գրուպ» ընկերության բիզնեսի զարգացման գծով տնօրեն Էդուարդ Ապրիյանն «Առավոտ»-ի հետ զրույցում նկատում է՝ բնակարանների թանկացումներն արհեստական չեն, բարձրացել են բնակարանների թե՛ շուկայական արժեքները, թե՛ վարձավճարները՝ համամասնորեն: Ապրիյանի դիտարկմամբ՝ վարձակալությամբ տրվող բնակարանների գների բարձրացումը պայմանավորված է զբոսաշրջային հոսքով. «Սա շատ գովելի է եւ ամենեւին վատ չէ»:
Մասնագետի ներկայացմամբ՝ եթե դիտարկենք, թե ինչու են ամենաշատը Կենտրոնում բարձրացել գները, ապա ընդհանուր միտում կա՝ կամ վաճառվում է ամենալավ ու ամենաթանկ բնակարանը՝ պայմանավորված իր եզակիությամբ կամ ամենաէժանը. «Ասենք, կարող է 400 հազար դոլարանոց բնակարան ընդամենը 10 հատ վաճառվի, սա Կենտրոնում ամենաբարձր արժեքն է»:
Արդյոք դրսում բնակվող մեր հայրենակիցներն են ամենաշատ բնակարան ձեռքբերողը: Վիճակագրական կոմիտեի տվյալներով, դրանք շատ չեն, բնակելի տուն եւ բնակարան միասին՝ մոտ 200 հատ՝ 2019-ի դեկտեմբերին:
Ապրիյանն այս առնչությամբ ասում է. «Դրսից, օրինակ, սփյուռքահայերը, այո գնում են, բայց տարիների իմ փորձը ցույց է տալիս, որ գների բարձրացումը արտասահմանցիների ներդրումների հետ կապված չէ, մեր ներքին շուկան է գինն այդպես ձեւավորում, արտասահմանցիների ազդեցությունը փոքր է»:
Անշարժ գույքի շուկայում Ապրիյանը հետաքրքիր միտում է նկատում. ասում է՝ Երեւանի կենտրոնում հիմա չկան բնակարաններ, կամ քիչ են, որոնք եկամտային հարկի վերադարձի պայմանով կարող են վաճառվել: Կենտրոնի բնակարանների մեծ մասը այդ օրենքով սահմանված 55 միլիոն դրամի շեմը գերազանցում է: Բացի այդ, Կենտրոնում արդեն իսկ շատ ու շատ սահմանափակ է կառուցապատումը, ազատ հողամասեր գրեթե չկան, որպեսզի կառուցապատվեն»:
Ապրիյանի կարծիքով՝ բնակարանների պահանջարկը կապված է եկամտային հարկի վերադարձով. «Հիմա մեծ պահանջարկ ունեն նորակառույցների բնակարանները, դրանք վաճառվում են անգամ այն պահից սկսած, երբ դեռ փաստաթղթավորման փուլում են: Այսպես շահում է գնորդը, նա գիտակցում է՝ անկախ նրանից, թե ինքը ինչպես է վարկը սպասարկելու, եկամտային հարկի վերադարձը շատ ու շատ շոշափելիորեն օգնում է, ստացվում է՝ ժողովրդի լեզվով ասած՝ փակովի բնակարան է ձեռք բերում եւ դա շահավետ է»:
Ապրիյանը նշում է՝ Կենտրոնից հետո Արաբկիր համայնքն է բնակարանների գներով եւ պահանջարկով, նա ասում է՝ հիմա Դավիթաշենում Ավանում, Նոր Նորքում, Մալաթիա-Սեբաստիայում էլ մեծ շինարարական աշխատանքներ են ընթանում, փաստաթղթավորվում են արդեն:
Դեռ անցյալ տարի կառավարությունը խոսում էր եկամտային հարկի վերադարձի մասին օրենքում փոփոխություն կատարելու մասին, անգամ կարծիքներ կային, որ եկամտային հարկի վերադարձը պետք է հանել կամ հատուցելու դեպքում բնակարանի գնի շեմը փոփոխել:
«Եկամտային հարկի վերադարձի մասին օրենքի փոփոխությունը վատ կազդի շուկայի վրա, որովհետեւ գնորդների 80%-ից ավելին ձեռք են բերում եկամտային հարկի վերադարձով: Շատ են մարդիկ, որոնք իրենց բնակարանային պայմաններն են ուզում փոխել, հին պանելային շենքերից տեղափոխվել ավելի լավ ու հարմարավետ բնակարաններ, եւ սա լավ է»,-ասում է Ապրիյանը:
Մասնագետի կարծիքով՝ հիմա նորակառույցները կամ շինարարության ընթացքում եղած բնակարանները դեռ չեն ծածկում շուկայի ամբողջ պահանջարկը. «Եկամտային հարկի վերադարձը եթե տեւական ժամանակ գործի՝ մենք դեռ պահանջարկ կունենանք, շուկան չի սպառվելու, վստահեցնում եմ: 3-ից 5 տարիների ընթացքում որքան կառուցվի, դեռ էլի պահանջարկ կլինի: Այնպես որ, օրենքը դեռ մի բան էլ դրական փոփոխությունների կարիք ունի, եկամտային հարկի վերադարձից պետությունը վնաս չի կրում, օգուտ է»:
Նելլի ԲԱԲԱՅԱՆ
«Առավոտ» օրաթերթ
11.02.2020
