«Պարոն Աբովյան, կարծում եմ՝ իրականում ոչ թե եվրոպական մամուլում եք կարդացել, այլ շահնազարյանական կանտորաների նյութեր եք կարդացել. այդ կեղծ թեզը բացառապես Դավիթ Շահնազարյանն է տարածել, եւ, ցավոք, այդ թեզը շարունակեց Արցախի հերոս եւ ներկայում ընտրություններում առաջադրված Վիտալի Բալասանյանը»,- ԱԺ նիստում այսօր անդրադառնալով ԲՀԿ քարտուղար Արման Աբովյանի հայտարարությանը, թե եվրոպական մամուլում շրջանառվում է տեղեկություն, որ Արցախի որոշ տարածքներում ստեղծվելու են հայերի եւ ադրբեջանցիների համատեղ բնակության գոտիներ, ասաց «Իմ քայլը» խմբակցության պատգամավոր, Ադրբեջանի հարցերով փորձագետ Տաթևիկ Հայրապետյանը:
Նրա խոսքով՝ այդ թեզն ամբողջությամբ ստի վրա է հիմնված. «Այն պաշտոնապես հերքվել է մեր ԱԳՆ-ի կողմից, ինչին ի պատասխան, ցավոք, Վիտալի Բալասանյանի գրասենյակը ևս մեկ անհեթեթ հայտարարություն տարածեց՝ պնդելով նախորդ ստահոդ հայտարարությունը։ Ավելին՝ ԱԳՆ-ին մեղադրեց դավաճանության մեջ: Պարոն Բալասանյան, անկեղծ ասած՝ մշտապես ակնածանքով եմ վերաբերվել Ձեր անցած ճանապարհին, բայց խորը հիասթափություն և ցավ եմ ապրում՝ տեսնելով, թե ինչպես եք Դուք դարձել ոմանց շահերի սպասարկողը։ Հասկանալի է, որ Արցախի թեման զգայուն է և չափազանց կարևոր՝ մեզանից յուրաքանչյուրի համար»:
Շարունակելով դիմել Բալասանյանին՝ Տաթեւիկ Հայրապետյանը նշեց. «Ժամանակին ինքներդ էիք կոչ անում Արցախը չդարձնել ներքաղաքական շահարկումների առարկա, եւ ինչի ենք մենք ականատես լինում հիմա: Քաղաքական ռեաբիլիտացիայի նպատակով դուք ինքներդ սկսել եք ստահոդ, չփաստարկված լուրեր տարածել՝ սնելով ադրբեջանական քարոզչամեքենան: Շեշտեմ կարեւոր դրույթ՝ Արցախի անվտանգությունը զիջման ենթակա չէ: Պարոն Բալասանյան, եթե ուզում եք դիրքորոշում հայտնել, պատասխանեք վարչապետի հարցին՝ համաձա՞յն եք Սերժ Սարգսյանի թողած ժառանգության հետ»։
Լուիզա ՍՈՒՔԻԱՍՅԱՆ
