Անդրադառնալով օրերս մամուլում հրապարակված այն լուրին, թե Հայկ Մարությանի կինը «խառնվում է» քաղաքապետարանի գործերին եւ անգամ կադրային քաղաքականություն որոշում, այսօր Երեւանի քաղաքապետ Հայկ Մարությանն ասաց, որ որեւէ մեկը չի կարող միջամտել նշանակումների հարցին: Նա ասաց, որ իր կինը եւ ընկերները օգնում են Երեւանի տարբեր խնդիրներ լուծելու հարցում:
«Ոչ ոք Հայաստանում ե՜ւ օրենքով, ե՛ւ դե ֆակտո չի կարող խառնվել Երեւանի քաղաքապետարանի նշանակումների հարցին: Դրա մեջ մտնում են բոլորը: Բայց, թե՛ իմ կինը, թե՛ իմ ընկերները հենց առաջին օրվանից օգնում են, որ մենք կարողանանք մեր խոստումներն իրականացնել: Օրինակ՝ իմ կինը եւ նրա մի խումբ ընկերներ, օգնել են մեզ, զրոյից ծրագիր են գրել, որպեսզի 5.3 միլիոն եվրո դրամաշնորհ լինի Երեւան քաղաքին: Իրենք այդ ծրագիրն իմ խնդրանքով գրել են, մենք դիմել ենք եւ մեծ մրցույթում հաղթել ենք: Խոսքը վտանգավոր թափոնների ծրագրի մասին է»,-ասաց Մարությանը:
Հարցին՝ Սահմանադրական փոփոխությունների հանրաքվեի քարոզարշավին մասնակցելու համար արձակուրդ վերցնելո՞ւ է, պարոն Մարությանն ի պատասխան ասաց, որ դեռ չի որոշել, բայց եթե չվերցնի էլ, ապա, քարոզելու է աշխատանքային ժամերից հետո:
Լուսինե ԲՈՒԴԱՂՅԱՆ
