«Նիկոլ Փաշինյանն իր ելույթում ասաց՝ եթե սպառնալիք կամ ինչ-որ ուժեր իրավական գործիքներով կամ այլ ճանապարհով կփորձեն կասեցնել այս գործընթացը, նրանք կհայտարարվեն հակապետական ուժեր: Ես մեկ էլ պապիցս եմ հակա բառը լսել, վերջին 20 տարում այդ բառը չեմ լսել: Այդ բառապաշարը, որ բերում է՝ պապս հակա էր, եկան կովը տարան, դա եմ ես հիշում ու այդ բառապաշարը ԱԺ ամբիոն է բերվում: Ի՞նչ է նշանակում հակա»,-այսօր լրագրողների հետ զրույցում իշխանություններին քննադատեց «Լուսավոր Հայաստան» խմբակցության ղեկավար Էդմոն Մարուքյանը:
Նա հիշեցրեց Փաշինյանի խոսքը, թե ովքեր կաջակցեն սահմանադրական փոփոխությունների գործընթացին, կլինեն նվիրյալներ. «Անդրադառնամ նվիրյալներին, նայեք ովքեր են՝ ինչքան քաղաքական պրոցեսներից դուրս մնացած անիմաստ մարդ կա, ասենք, այդ մարդուց դուք էլ չեք ուզում հարցազրույց վերցնեք, անիմաստ է այդ մարդու հետ խոսելը, այսօր նրանք լծվել են «այո»,-ի քարոզին, որովհետեւ իրենց կարծիքը լսող էլ չկա»:
Ըստ Մարուքյանի, 2000 տեղամասում խախտումով են անելու սահմանադրական հանրաքվեն, քանի որ չի լինելու ՍԴ-ի եզրակացությունը. «Բոլորին կոչ ենք անում՝ մի՛ դարձեք հակահերոս, իշխանության սատանաների ձեւավորման գործընթացի մեջ մի մտեք, թող գնան իրենց «այո»-ն քարոզեն»:
Կարդացեք նաև
Aravot.am-ը հարցրեց՝ իմքայլականներն ասում են, որ եթե հեղափոխության ժամանակ էլ այդպես օրենքի «տառակերության» հետեւից ընկնեինք, հեղափոխությունն էլ չէր լինի, ու ոնց որ այն ժամանակ ճանապարհային քարտեզը մշակելիս դուք ձեռքերը լվացիք, հիմա էլ նույնն եք անում, չե՞ք կարծում, որ օրենքները մարդկանց համար են, ոչ թե հակառակը՝ Մարուքյանը արձագանքեց. «Եթե ես հիմա սկսեմ պատմել, թե հեղափոխության ժամանակ այդ ասողներից ով ինչով է զբաղված եղել ու ինչ է ասել այս կաբինետում, կարող է այդ մարդիկ իրենց խփեն, ինքնասպանության դիմեն, իսկ ես չեմ ուզում ինքնասպանության դրդելու հոդվածով դատվեմ»:
Նա վստահեցրեց, որ իշխանության ներկայացուցիչները սխալ են մեկնաբանում, ասում են՝ օրենք, ոչ մի բան չկա, ժողովուրդն է որոշում. «Եթե մի բան արել ես ու մոտդ ստացվել է, դա չի նշանակում, որ ամեն անգամ դա պետք է անես ու ասես՝ հեղափոխություն ենք արել»:
Մարուքյանն ասաց, որ հանրաքվեի օրն իրենք տեղամաս չեն գնալու, այլ, օրինակ, Ծաղկազարդի պատարագին:
Հռիփսիմե ՋԵԲԵՋՅԱՆ
