ԱԺ այսօրվա նիստում քննարկվում է «Իմ քայլի» մի խումբ պատգամավորների հեղինակած՝ «Պետական նպաստների մասին օրենքում» լրացում կատարելու օրինագիծը, որով սահմանվում է՝ խնամակալության նպաստ պետք է տրամադրվի շուրջօրյա խնամակալության կարիք ունեցող անձանց խնամակալներին:
«Օրինագծի շահառուներն են մինչեւ 14 տարեկան ծնողազուրկ եւ հոգեկան առողջության խնդիրներ ունեցող երեխաները՝ 433 անձ»,-տեղեկացրեց օրինագծի զեկուցող, «Իմ քայլի» պատգամավոր Նարեկ Զեյնալյանը:
Նա հավելեց, որ օրինագծով առաջարկվում է նշյալ խմբի անձանց յուրաքանչյուր խնամակալին 26.500 դրամ նպաստ տրամադրել:
ԼՀԿ պատգամավոր Սրբուհի Գրիգորյանն էլ առաջարկեց, որպեսզի մշտական խնամք պահանջող երեխաների մորը նվազագույն աշխատավարձի չափով վճարում տրվի եւ դա հաշվարկվի որպես աշխատանքային փորձ. «Վատառողջ երեխա ունենալը չպետք է դատավճիռ լինի այն ծնողների համար, որոնք 24 ժամ երեխայի կողքին են եւ աշխատելու հնարավորություն չունեն, ինչի պատճառով կենսաթոշակային տարիքում նրանց թոշակը նվազագույն է լինում»:
Կարդացեք նաև
Հավելենք, որ օրինագիծը դեռ պետք է երկրորդ ընթերցմամբ քննարկվի:
Այսօրվա քննարկման ընթացքում «Իմ քայլի» պատգամավոր Սոֆյա Հովսեփյանը գործընկերներին կոչ արեց ճիշտ տերմինաբանություն օգտագործել եւ չասել «հաշմանդամ», «հիվանդ» եւ նմանօրինակ արտահայտություններ: Պատգամավորը նաեւ առաջարկեց հետագայում այս օրինագծի շահառուների տարիքային շեմը բարձրացնել եւ կարիքի շրջանակն ընդլայնել:
Լուիզա ՍՈՒՔԻԱՍՅԱՆ
